U 2015 hodzie nie vykananyja piać ź dzieviaci najvažniejšych paramietraŭ prahnozu sacyjalna-ekanamičnaha raźvićcia — pa roście VUP, pradukcyjnaści pracy, ekspartu i realnych dachodaŭ nasielnictva, a taksama pa abjomie budaŭnictva žylla ź dziaržpadtrymkaj. Pra heta zajaviŭ premjer-ministr Biełarusi Andrej Kabiakoŭ 20 lutaha na pasiadžeńni Savieta ministraŭ.
Kiraŭnik urada zaznačyŭ, što 2015 hod prademanstravaŭ vysokuju zaležnaść ekanomiki Biełarusi ad źniešniaj kanjunktury syravinnych rynkaŭ, što šmat u čym i vyznačyła vynik jaje pracy, paviedamlaje pres-słužba ŭrada.
«U pieršuju čarhu, nam nie ŭdałosia zabiaśpiečyć zapłanavanuju dynamiku ŭ halinach i ekanomicy ŭ cełym, — zajaviŭ Kabiakoŭ. — U paraŭnańni z uzroŭniem 2014 hoda źnižanyja abjomy pramysłovaj vytvorčaści, budaŭnictva, sielskahaspadarčaj vytvorčaści, handlu».
U suviazi z hetym jość surjoznyja pytańni da pracy halinovych ministerstvaŭ, padkreśliŭ premjer. Pa vynikach 2015 hoda Minbudarchitektury vykanany tolki adzin z 14 daviedzienych pakazčykaŭ, Minpramam — 2 z 12, Minsielhascharčam i kancernam «Biellespapierapram» — 2 z 10. Kancern «Biellehpram» nie vykanaŭ ni adnaho prahnoznaha pakazčyka.
Padobnaja situacyja i ŭ rehijonach. Tolki Mahiloŭskaja vobłaść vykanała pałovu daviedzienych pakazčykaŭ. «U astatnich abłaściej i Minska i hetaha niama, Hrodzienskaja vobłaść zabiaśpiečyła vykanańnie tolki čverci pakazčykaŭ», — zajaviŭ Kabiakoŭ.
Jak paviedamiŭ premjer, pa vynikach hoda ŭ Biełarusi vykananyja pakazčyki pa indeksie spažyvieckich cen, enierhajomistaści VUP, rentabielnaści prodažu ŭ pramysłovaści, źniešniehandlovym salda da VUP.
Pierš za ŭsio, adznačyŭ Kabiakoŭ, zabiaśpiečany zbałansavany źniešni handal — stanoŭčaje salda skłała 205 młn dalaraŭ ZŠA. «Takich vynikaŭ u sučasnaj historyi sa stanoŭčym salda było da 2015 hoda dva — u 2005 i 2012 hodzie», — nahadaŭ jon.
Palepšany płaciežny bałans krainy — deficyt rachunku biahučych apieracyj płaciežnaha bałansu za 11 miesiacaŭ 2015 hoda ŭ paraŭnańni z anałahičnym pieryjadam 2014 hoda skaraciŭsia prykładna na 2,4 młrd dalaraŭ ZŠA — z 5,8 da 3,1% VUP. «Heta taksama vielmi dobry jakasny vynik», — padkreśliŭ jon.
Pavodle jaho słoŭ, žorstkaja manietarnaja palityka, hnutkaje kursaŭtvareńnie, kantrol nad hrašovaj prapanovaj dazvolili ŭtrymać inflacyju ŭ zapłanavanych miežach: rost cen nie pieravysiŭ 12%, heta minimalnaje značeńnie za apošnija piać hadoŭ. Taksama, ličyć Kabiakoŭ, zabiaśpiečana stabilnaść na spažyvieckim rynku. «Niachaj i pavolna, ale adnačasova sa źnižeńniem inflacyi źnizilisia i pracentnyja staŭki pa kredytach, — kanstatavaŭ jon. — Pakul niedastatkova, ale tym nie mienš, za hod staŭku pa novych kredytach u nacyjanalnaj valucie biez uliku lhotnych źnizili praktyčna na 10 pracentnych punktaŭ — z 43,5% hadavych u studzieni 2015 hoda da 34,2% hadavych u studzieni 2016 hoda». Premjer-ministr padkreśliŭ, što zadača pa źnižeńni pracentnych stavak pa novych kredytach praciahvaje zastavacca adnoj z samych aktualnych u ekanomicy krainy.
Kabiakoŭ taksama nahadaŭ, što praficyt kansalidavanaha biudžetu za 2015 hod skłaŭ 1,8% VUP.
Pavodle słoŭ premjera, u pačatku 2016 hoda źniešnija rynki praciahvajuć ściskacca, nafta znoŭ upała ŭ košcie, a śledam za joj devalvujucca i nacyjanalnyja valuty asnoŭnych handlovych partnioraŭ Biełarusi, što nie moža nie adbicca na ŭzajemnym handli. U takich umovach, adznačyŭ premjer, zachoŭvajecca ahulnaja tendencyja — źnižeńnie popytu na składanatechničnuju, inviestycyjnuju pradukcyju na tradycyjnych dla Biełarusi rynkach.
«U vypadku zachavańnia hetych tendencyj na praciahu 2016 hoda my budziem zmušanyja rabić enierhičnyja kroki pa biudžetnaj kansalidacyi, — zajaviŭ jon. — Pakul, jak ja ŭžo kazaŭ, biahučy razryŭ finansavańnia biudžetu aceńvajecca ŭ 38,6 trłn. rubloŭ, tamu my surjozna pierahledzieli biahučyja kapitalnyja raschody biudžetu, u suviazi z hetym čakana ŭ studzieni asieli abjomy budaŭniča-mantažnych rabot — 81,5% i inviestycyi ŭ asnoŭny kapitał — 80,7%».
«Tym nie mienš, nas nichto nie vyzvalaŭ ad vykanańnia narmatyŭnych pradpisańniaŭ ukaza prezidenta № 504 ab vykanańni najvažniejšych paramietraŭ prahnozu sacyjalna-ekanamičnaha raźvićcia na 2016 hod», — padkreśliŭ Kabiakoŭ.
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Kamientary