Fest «Kaho lubiš? Lublu Biełaruś!» nie dazvolili, bo «adbyłasia ŭciečka etylenhlikolu»
6 lutaha «Art Siadziba» padpisała z Pałacam sportu damovu na arendu placoŭki dla praviadzieńnia 25 sakavika muzyčnaha fiestyvalu «Kaho lubiš? Lublu Biełaruś!».
U hety ž dzień u Minski harvykankam byli padadzienyja dakumienty na atrymańnie hastrolnaha paśviedčańnia na prava praviadzieńnia hetaha kulturnaha mierapryjemstva.
Praz tydzień, u dzień adkazu na zajaŭku zhodna z zakanadaŭstvam, «Art Siadziba» spačatku atrymała list ad kiraŭnictva KS RUP «Pałac sportu» ź infarmacyjaj, što
«21 lutaha 2016 h. padčas praviadzieńnia Adkrytaha čempijanatu Respubliki Biełaruś pa samba adbyłasia ŭciečka etylenhlikolu na ladovaj arenie Pałaca sportu, jakaja pryviała da parušeńnia pracy sistemy choładazabieśpiačeńnia. Ramontna-adnaŭlenčyja raboty buduć pravodzicca z 21 da 30 sakavika 2016 h. Pa hetaj pryčynie praviadzieńnie 25 sakavika 2016 h. kancertnaha mierapryjemstva nie ŭjaŭlajecca mahčymym».
Praź niekalki hadzin pryjšła i admova ad Minharvykankama, jaki nie vydaŭ dazvoł na kancert «Kaho lubiš? Lublu Biełaruś!» z-za taho, što 25 sakavika ŭ Pałacy sportu buduć adbyvacca ramontna-adnaŭlenčyja raboty sistemy choładazabieśpiačeńnia.
«Art Siadziba» publikuje aryhinały dakumientaŭ, jakija atrymała arhanizacyja.
Kamientuje adkaz i padrabiaznaści spravy kiraŭnik «Art Siadziby» Pavieł Biełavus:
«Ščyra, kali my płanavali mierapryjemstva i padavali zajaŭku, to prykładna aceńvali naš šaniec na atrymańnie pazityŭnaha adkazu — 50 na 50, to bok zusim nie pradkazalna. Ale atrymałasia ŭsio pradkazalna.
U kancercie pahadzilisia prymać udzieł usie najlepšyja hurty krainy: Trubetskoy, Akute, Lavon Volski, Vinsent, Krambambula, Krama, Dzieciuki, Vuraj sa Śpieŭnym schodam, Amaroka, Amplituda śmiełaści, Mutnajevoka, Niejra Dziubiel,:B:N:, Raźbitaje serca pacana.
Kali my pieršy raz pryjšli da dyrektara Pałacu sportu Siarhieja Pranoviča, to i damovu, kab padać na «hastrolku» za dzień padpisali, bo data 25 sakavika ŭ hrafiku była volnaja. Tamu i pryčynu z «utiečkoj etilenhlikola» ja, upeŭnieny, jamu daviałosia nie samomu prydumlać. Bo tolki arenda placoŭki kaštuje kala 10 tysiač dalaraŭ, a jakoje pradpryjemstva nie zacikaŭlenaje ŭ atrymańni hrošaj, tym bolš u taki składany čas.
U zajaŭcy ŭ Minharvykankam my taksama nie chavali našych ščyrych metaŭ mierapryjemstva, što fiestyval budzie pryśviečany 98 hadavinie abviaščeńnia BNR, jakoje adbyłosia 25 sakavika 1918 hoda ŭ Minsku, i projdzie ŭ ramkach respublikanskaha Hoda kultury, jakim u Respublicy Biełaruś abjaŭleny 2016 hod.
U prahramie na pačatku my paznačyli vystupy pradstaŭnikoŭ Ministerstva kultury i Nacyjanalnaj akademii navuk Respubliki Biełaruś z uračystymi pramovami. A metami ŭsiaho mierapryjemstva paznačyli patryjatyčnaje vychavańnie moładzi, papularyzacyju sučasnaj biełaruskaj kultury, biełaruskaj movy i važnych histaryčnych padziej biełaruskaj dziaržaŭnaści.
Da taho ž my nakiravali infarmacyjnyja listy staršyni Minharvykankamu, kiraŭniku Centralnaha rajonu Minska, kiraŭnictvu Ministerstva kultury, milicyi, KDB, u Administracyju prezidenta, što mierapryjemstva maje kulturna-patryjatyčny charaktar, i my hatovyja jaho pravieści stroha ŭ ramkach zakanadaŭstva. Voś zaraz čakajem z usich hetych ustanoŭ adkazy.
My nie hublajem nadzieju, što tam zrazumiejuć važnaść hetaha mierapryjemtsva i zmohuć razabracca z tymi, chto zahadaŭ pryznačyć na 25 sakavika ramont u Pałacy sportu «utiečki etilenhlikola». A dla hetaha treba stvaryć hramadski rezanans.
Ja nie razumieju, čamu čynoŭniki nie mohuć uciamić, što zabarona takich fiestyvalaŭ jak «Kaho lubiš? Lublu Biełaruś!» ci kancertaŭ biełaruskich hurtoŭ — heta nie tolki imidžavyja, ale i finansavyja straty dla krainy.
Prosty padlik: na kancerty pa-za miežami Biełarusi biełaruskich hurtoŭ i vykanaŭcaŭ: Krambambuli, Brutto, Źmitra Vajciuškieviča i Lavona Volskaha źbirajecca da 5 tysiač i bolš biełarusaŭ. Na adnu takuju pajezdku (kvitki, daroha, charčavańnie, hatel, padarunki, zakupy) adzin čałaviek vydatkoŭvaje kala 200 dalaraŭ. Piać tysiač čałaviek vyvozić za adzin taki fiestyval ź Biełarusi ŭ Litvu, Varšavu ci Biełastok 1 000 000 dalaraŭ. A takich kancertaŭ, z-za zabaronaŭ u Biełarusi, adbyvajecca 5-10 u hod.
Nazavicie mnie jašče choć adzin suśvietny prykład: kab 5 tysiač čałaviek z adnoj krainy jechali na vychodnyja ŭ inšuju susiedniuju krainu, kab pasłuchać pieśni hurtoŭ sa svajoj krainy na rodnaj movie?
Dalej ličycie sami i rabicie vysnovy, chto zajmajecca ŭ Biełarusi antydziaržaŭnaj dziejnaściu. Chto prymaje rašeńni, z-za jakich ajčynnyja placoŭki i dziaržbiudžet niedaatrymlivajuć prybytak?»
Da hetaha času Minharvykankam nie daŭ dazvołu i na kancert hurta «Brutto», voś što paviedamili mieniedžaru «Art Siadziby» Alesiu Śniehu, jaki zabiraŭ admovu:
«Siońnia ja byŭ u Harvykankamie. Zapytaŭ pra los kancertu «Brutto», u «Adnym vaknie» skazali, što ŭ ich budzie prykładna taki ž adkaz, ale z samim adkazam kiraŭnictva niešta zaciahvaje».
Kamientary