Takoha raniej nie było! Biełaruski baksior padpisaŭ kantrakt z najlepšym suśvietnym mieniedžaram
Nie bolš jak tydzień tamu biełaruski baksior Siarhiej Rabčanka padpisaŭ kantrakt z «šerym kardynałam» suśvietnaha boksu Ełam Chejmanam.
Chejman – čałaviek, jaki ŭžo try hady zapar pryznajecca mieniedžaram hoda. Naprykład, mienavita jon zajmajecca arhanizacyjaŭ bajoŭ Fłojda Mejueziera – niepieramožnaha amierykanskaha čempijona ŭ paŭsiaredniaj vazie, jaki vałodaje pajasami pa viersijach WBC, WBA, WBO i ŭznačalvaje ŭsie suśvietnyja rejtynhi.
Ci moh taki čałaviek, jak Chejman, uziacca za aby kaho? Miarkujcie sami — biełarus Siarhiej Rabčanka siońnia maje 27 pieramoh na prafiesijnym rynhu i adnu parazu. Jon — čempijon Jeŭropy siarod prafiesijanałaŭ! I ŭ aŭtarytetnym rejtynhu WBA zajmaje 10 pazicyju ŭ pieršaj siaredniaj vazie (da 69,8 kh.).
Pačynaŭ karjeru Rabčanka ŭ minskim baksiorskim kłubie Golden Gloves (Załatyja palčatki) pad kiraŭnictvam treniera Siarhieja Pytaleva – tam Rabčanka zajmaŭsia 15 hadoŭ, pierad tym jak pierajechać treniravacca ŭ Brytaniju da lehiendarnaha Ryki Chetana.
U amatarskim boksie Rabčanka pravioŭ 228 bajoŭ, ź jakich pieramoh u 217!
Ciapier vyhladaje, što paśla padpisańnia kantrakta z Ełam Chejmanam biełarus pajedzie žyć i treniravacca ŭ ZŠA.
Siarhiej užo skazaŭ sajtu vringe.com, što jon «pierabje ŭsich najlepšych amierykancaŭ».
Na siońnia Rabčanka – najbolš pierśpiektyŭny biełaruski baksior-prafiesijanał. Ale niedaloka ad jaho adyšoŭ i jašče adzin vychavaniec kłuba Golden Gloves Kirył Relich, jaki siońnia zajmaje 5 miesca ŭ rejtynhu WBO u katehoryi da 63,5 kh. Kirył maładziejšy za Siarhieja na 4 hady, tamu taksama maje dobryja šansy stać suśvietnaj zorkaj.
Darečy, trenier kłuba Golden Gloves Siarhiej Pytaleŭ padrychtavaŭ cełaje suzorje viadomych biełaruskich baksioraŭ. Siarod ich čatyry majstra sportu mižnarodnaha kłasu, adzin zasłužany majstar i 20 majstroŭ sportu.
U chutkim časie my zdymiem videa pra zału, ź jakoj vychodziać čempijony, sačycie za sajtam «Našaj Nivy».
Kamientary