Izrail maje namier zachavać svajo dypłamatyčnaje pradstaŭnictva ŭ Biełarusi, paviedamiła 10 sakavika časovy pavierany ŭ spravach pasolstva Izraila ŭ Biełarusi Julija Račynski-Śpivakoŭ.
Pavodle jaje słoŭ, rašeńnie nie zakryvać pasolstva ŭ Biełarusi abviaściŭ premjer-ministr Izraila Bińjamin Nietańjachu na niadaŭniaj sustrečy ź ministram absorbcyi Izraila Zieevam Elkinym. Pra heta ministr paviedamiŭ 9 sakavika ŭ intervju ruskamoŭnamu radyjo «Hołos Izraila».
Pasolstva čakaje kankretnych ukazańniaŭ z MZS Izraila, paviedamiła časovy pavierany. Pavodle jaje słoŭ, biełaruskija kalehi aficyjna jašče nie infarmavanyja ab płanach Izraila adnosna pasolstva ŭ Minsku, ale taki namier jość.
Jak paviedamlałasia raniej, u žniŭni 2015 hoda ŭrad Izraila padtrymaŭ prapanovu premjer-ministra Nietańjachu ab likvidacyi siami dypłamatyčnych pradstaŭnictvaŭ u suviazi sa skaračeńniem vydatkaŭ. U liku takich dyppradstaŭnictvaŭ izrailski premjer nazvaŭ i pasolstva ŭ Biełarusi. Krychu paźniej były izrailski pasoł u Biełarusi Iosif Šahał paviedamiŭ, što ŭ MZS Izraila stvoranaja kamisija pa vyvučeńni pytańnia ab skaračeńni siami dyppradstaŭnictvaŭ u śviecie. Ci zakranie skaračeńnie pasolstva ŭ Minsku, nieviadoma, dadaŭ jon.
26 listapada pamiž Biełaruśsiu i Izrailem pačaŭ dziejničać biaźvizavy režym.
U studzieni 2016 hoda pres-słužba biełaruskaha MZS paviedamiła, što ŭ adkaz na zakryćcio pasolstva Izraila ŭ Minsku Biełaruś zakryje svaju dypmisiju ŭ Tel-Avivie, jak heta praduhledžana «zvyčajnaj dypłamatyčnaj praktykaj». «Ličym, što izrailski bok robić pamyłku, ihnarujučy toj fakt, što nas źviazvajuć los dziasiatkaŭ tysiač ludziej, dla jakich Izrail i Biełaruś źjaŭlajucca blizkimi i rodnymi krainami, a taksama ŭ cełym pazityŭnuju dynamiku dvuchbakovych adnosin u roznych śfierach», — adznačałasia ŭ paviedamleńni MZS.
Ciapier čytajuć
Advakat Kanavałava, rasstralanaha za terakt u mietro, upieršyniu raskazaŭ, što adbyvałasia padčas śledstva35
Kamientary