Makiej: Pravy čałavieka — nie tolki ŭ mahčymaści vychodzić na vulicu z roznymi łozunhami
Pravy čałavieka nie abmiažoŭvajucca tolki mahčymaściu vychodzić na vulicu z roznymi łozunhami, zajaviŭ ministr zamiežnych spraŭ Biełarusi Uładzimir Makiej u intervju vienhierskaj haziecie «Madźjar Chirłap».
Hałoŭnaja zadača biełaruskich uład — zachavać stabilnaść u hramadstvie, zabiaśpiečyć ustojlivaje ekanamičnaje raźvićcio, jakoje pryviadzie da ŭmacavańnia palityčnaj niezaležnaści i suvierenitetu, adznačyŭ Uładzimir Makiej. «Viadoma, paralelna my pavinny kłapacicca ab zabieśpiačeńni pravoŭ čałavieka, - kanstatavaŭ jon. - Ale pravy čałavieka - heta nie tolki prava vychodzić na vulicu z roznymi łozunhami. Heta taksama prava na pracu, na žyllo, na adukacyju. Kali ŭ čałavieka heta jość, to jon zadumajecca, ci treba jamu vychodzić i kryčać «Dałoŭ taho! Dałoŭ hetaha!»
«Tyja, chto vychodzić na vulicu, pavinny dziejničać pa zakonach i praviłach, nie pravakavać ułady, inakš budzie chaos i anarchija», — pradoŭžyŭ ministr. Kiraŭnik biełaruskaha źniešniepalityčnaha viedamstva pierakanany, što nie treba naciskać na krainy, nieabchodny dyjałoh i vypracoŭka takoj kancepcyi pavodzin, jakaja daść mahčymaść kožnaj dziaržavie raźvivacca ŭ rečyščy ahulnych tendencyj, pravy čałavieka heta ci ekanomika, ale z ulikam miascovaj śpiecyfiki.
Adkazvajučy na pytańnie ab zachavańni pravoŭ roznych mienšaściej, čamu časta sprabujuć nadać palityčnuju afarboŭku, Uładzimir Makiej padkreśliŭ, što ŭ Biełarusi, «jak by nas ni abvinavačvali ŭ parušeńniach niejkich pravoŭ čałavieka, kateharyčna vystupajuć za zachavańnie tradycyjnaj siamji». Jon rastłumačyŭ heta tym, što «biełaruskaja nacyja vielmi spakojnaja, talerantnaja, ciarplivaja, artadaksalnaja ŭ niekatorych pytańniach». Ministr vykazaŭ apasieńni, što pa hetym pytańni biełaruski bok nikoli nie znojdzie razumieńnia z tymi, chto budzie akazvać na jaho nacisk.
«Našy intaresy skancentravanyja na tym, kab na našaj ziamli ludzi žyli spakojna, raźvivalisia, kab ros ich dabrabyt. Ale jość vialikija hieapalityčnyja ihraki, jakija sprabujuć zrabić tak, kab śviet žyŭ pa ich razumieńni, pa ich praviłach. U hetym płanie siarednija, małyja dziaržavy pavinny taksama abjadnoŭvacca, kab ich hołas byŭ pačuty. Na placoŭcy AAN heta robicca, ale, na žal, nie zaŭsiody efiektyŭna», — kanstatavaŭ Uładzimir Makiej.
Ciapier čytajuć
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary