U Viciebsku zatrymanyja čaćviora mužčyn, jakija zajmalisia častkovaj padrobkaj dalaraŭ ZŠA. Pra heta siońnia paviedamili žurnalistam pravaachoŭniki na sumiesnym bryfinhu ŭpraŭleńnia Śledčaha kamiteta pa Viciebskaj vobłaści i UUS abłvykankama.
Staršy śledčy adździeła pa rasśledavańni złačynstvaŭ u śfiery ekanomiki ŭpraŭleńnia Śledčaha kamiteta pa Viciebskaj vobłaści Julija Sałocha prainfarmavała, što ŭpraŭleńnie rasśleduje kryminalnuju spravu, rpaspačatuju ŭ dačynieńni da 4 žycharoŭ horada Viciebska, pa č.1 art.221 Kryminalnaha kodeksa Biełarusi.
«Fihurantam kryminalnaj spravy 1974, 1990, z 1995 i 1986 hadoŭ naradžeńnia ŭžo vystaŭlenaje abvinavačvańnie, da ich prymienienaja miera strymańnia ŭ vyhladzie zaklučeńnia pad vartu, — kanstatavała Julija Sałocha. — U chodzie papiaredniaha rasśledavańnia vyjaŭlena, što hetyja hramadzianie sa śniežnia 2015 hoda pa studzień 2016 hoda ažyćciavili zbyt hrašovych biletaŭ naminałam $50 na ahulnuju sumu $1850, što składaje 37 hrašovych biletaŭ. Hetyja kupiury vyrablenyja z sapraŭdnych šlacham źmieny ich naminału».
Praviedzienyja pieratrusy pa miescy žycharstva abvinavačanych, vočnyja staŭki, apaznańni, pravierki pakazańniaŭ na miescy, dapytanyja šmatlikija śviedki, praviedzienyja kryminalistyčnyja ekśpiertyzy.
Staršy opierupaŭnavažany 2-ha adździeła ŭpraŭleńnia pa baraćbie z ekanamičnymi złačynstvami UUS Viciebskaha abłvykankama Alaksiej Iahnatkaŭ adznačyŭ, što spačatku byŭ vyjaŭleny adzin zbytčyk.
«U chodzie śledčych i apieratyŭna-vyšukovych mierapryjemstvaŭ jon pryznaŭsia, ad kaho atrymaŭ falšyŭki», — padkreśliŭ staršy opierupaŭnavažany. Usie padrobki byli vyjaŭlenyja ŭ bankach, bo hramadzianam adroźnić falšyŭku nie prosta. Źviartajučysia da hramadzian, jon nahadaŭ, što nabyvać valutu varta tolki ŭ bankaŭskich ustanovach. «Vykonvajučy praviły valutna-abmiennych apieracyj, hramadzianie zaścierahuć siabie ad falšyvak», — dadaŭ jon.
Akramia hetaha, jon źviarnuŭsia da žycharoŭ vobłaści z prośbaj pravieści reviziju svaich valutnych źbieražeńniaŭ i ŭ vypadku vyjaŭleńnia padazronych $50 kupiur paviedamić pra heta pa telefonach 60-35-77 albo 8 (029) 659-31-79.
Pra pieršuju vyjaŭlenuju falšyŭku z hetaj sieryi paviedamlałasia raniej. Nočču 2 studzienia małady čałaviek prynios u punkt abmienu valut u budynku čyhunačnaha vakzału stancyi Viciebsk $50. Hrošy mieli davoli dziŭny vyhlad: byli vyrablenyja z sapraŭdnaj kupiury naminałam $5 sposabam nalepvańnia papiarovych frahmientaŭ ličby «50» i nadpisu FIFTY DOLLARS. Kasir, jakaja pryniała «palepšany» varyjant, vyklikała pravaachoŭnikaŭ. Małady čałaviek skazaŭ milicyjantam, što hetaj kupiuraj jamu viarnuli častku doŭhu, i jon nie padazravaŭ, što hrošy falšyvyja.
Ciapier čytajuć
Połk Kalinoŭskaha paviedamiŭ pra hibiel troch bajcoŭ6
Kamientary