U Minsku pačała pracu štohadovaja tematyčnaja vystava «Adpačynak-2016». Jana prachodzić z 6 pa 9 krasavika ŭ vystavačnym centry «BiełEkspa» na Janki Kupały, 27; košt kvitka — 20 000 rubloŭ. Reparcior «Našaj Nivy» daznaŭsia, dzie i za jakija hrošy sioleta prapanujuć adpačyć biełarusam.
Zatoka, Čornaje mora, Ukraina.
Samy tanny «marski» adpačynak prapanujecca ŭ susiedniaj Ukrainie. Najlepšaja prapanova, jakuju my znajšli, kaštuje trochi bolš za 3 młn na 10 dzion dla adnaho čałavieka. Va Ukrainie nam prapanujuć Zatoku, inšyja kurorty Adeskaj i Chiersonskaj abłaściej. U hetym ža cenavym siehmiencie možna znajści prapanovy padarožžaŭ u Bałharyju i Bałtyju.
Papularnyja nakirunki ŭ Turcyju i Jehipiet taksama prapanoŭvajuć dosyć aktyŭna. Pakul pradaŭcy nastrojeny aptymistyčna i ŭpeŭnieny, što sioleta zapyt na ich pačnie adnaŭlacca. Košt adpačynku ŭ Turcyi składaje prykładna 5,5—6 młn za 7 dzion.
Jość jašče Tunis dy Maroka. «Biudžetny» pakiet za 7 dzion u hetyja krainy kaštuje ad 10 młn na čałavieka. Pradaŭcy ŭpeŭnivajuć, što miery biaśpieki ŭ Tunisie pryniaty dobryja i turystam ničoha nie pahražaje.
Daradca pa turyźmie Kuby ščyra zaprašaje biełarusaŭ u svaju krainu i zapeŭnivaje, što na małych, «nieraskručanych» vyspach možna adpačyć vielmi tanna, trapiŭšy pry hetym prosta ŭ raj. Bolšaść biudžetu padarožža na Vostraŭ Svabody pryjdziecca patracić na pieralot. Pry hetym jon adznačyŭ, što «Aerafłot» prapanuje značna bolš vyhadnyja ŭmovy, čym «Biełavija», a taksama raskazaŭ, što dla taho, kab arhanizavać tannyja čartary pamiž našymi krainami, treba zahruzić minimum 8 rejsaŭ. Heta całkam mahčyma, ale zaležyć tolki ad turapierataraŭ.
Hruzija razharnuła na vystavie sapraŭdny kaściumavany śpiektakl. Pradstaŭniki turystyčnaha biznesu hetaj krainy śćviardžajuć, što tolki ŭ Hruziii možna paspytać unikalny kaktejl Jeŭropa + Azija + Kaŭkaz + mora. Pieralot u abodva baki kaštuje kala 4 młn za adzin bilet, a ceny ŭ hruzinskich hatelach pačynajucca ad miljona na dvaich haściej za sutki.
Ceny na adpačynak u miežach Biełarusi pačynajucca ad 100 tysiač rubloŭ za sutki. Ahułam pa vynikach minułaha siezona abjem unutranaha turyzmu vyras na 20% u paraŭnańni z pazaminułym, i sioleta płanujecca dalejšy rost. Apieratary, jakija aryjentujucca na biełaruski rynak, śćviardžajuć, što sprava nie tolki (ci nie stolki) u tym, što ŭ ludiej mieniej hrošaj. I nie ŭ tym, što ŭ mnohich papularnych krainach uźnikli niejkija prablemy. Jany schilnyja tłumačyć pavieličeńnie popytu rostam cikavaści biełarusaŭ da Biełarusi i adpačynku ŭ jaje miežach, a taksama tym, što nie treba rabić anijakija vizy i tracić čas i hrošy na darohu.
U vystavie biaruć udzieł bolš jak sto kampanij ź Biełarusi, Rasii, Litvy, Bałharyi, Słavakii, Polščy, Hruzii, Ukrainy, Turcyi, Hrecyi, Sierbii dy inšych. U prahramie vystavy zajaŭleny prezientacyi, kruhłyja stały, sieminary i prezientacyi.
Jak pryznałasia ŭ razmovie dyrektarka adnoj z turystyčnych firm, užo druhi siezon zapar adzinaja meta jaje biznesu — «pratrymacca». Spad kupčaj zdolnaści adčuvajecca vielmi istotna. Bolšaść turapierataraŭ pieraaryjentavałasia ŭ hetym siezonie na «biudžetnyja» kirunki i «biudžetnyja» pakiety. Prynamsi, na firmie majoj surazmoŭcy ŭ hetym siezonie, u adroźnieńnie ad minułych, nie było jašče nivodnaj zamovy na tak zvany «elitny» adpačynak koštam ad tysiačy dalaraŭ na čałavieka. Heta aznačaje, što prapanoŭ «biudžetnaha» i «supierbiudžetnaha» adpačynku ŭ hetym siezonie budzie šmat.
Ciapier čytajuć
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary