U sud Centralnaha rajona Minska pastupiła kryminalnaja sprava ŭ dačynieńni da troch fihurantaŭ kryminalnaj spravy, u tym liku baćki i syna Japryncavych, jakija abvinavačvajucca ŭ ździajśnieńni złačynstva, praduhledžanaha č. 4 art. 209 KK (machlarstva, ździejśnienaje arhanizavanaj hrupaj albo ŭ asabliva bujnym pamiery). Pra heta paviedamiła pamočnik staršyni Minskaha haradskoha suda Anastasija Šylvian.
Data pačatku sudovaha razboru pakul nie vyznačanaja.
Pra zaviaršeńnie śledstva pa kryminalnaj spravie namieśnika hienieralnaha dyrektara kampanii «Trajpł» Uładzimira Japryncava i jaho syna Kaźbieka KDB paviedamiła ŭ siaredzinie krasavika. Abodva abvinavačanyja znachodziacca pad vartaj u śledčym izalatary KDB.
Infarmacyja pra zatrymańnie baćki i syna Japryncavych źjaviłasia ŭ žniŭni minułaha hoda, ale paćvierdziłasia tolki ŭ śniežni. Viadoma, što na momant aryštu Japryncaŭ-starejšy byŭ kiraŭnikom fiederacyj samba i dziudo.
U sakaviku hetaha hoda kiraŭnik KDB Valeryj Vakulčyk paviedamiŭ, što z zajavaj ab supraćpraŭnaj dziejnaści Uładzimira Japryncava ŭ viedamstva letam minułaha hoda źviarnuŭsia kiraŭnik hrupy kampanij «Trajpł» Juryj Čyž i dva jaho rasijskija partniory.
U chodzie rasśledavańnia było vyjaŭlena ŭchileńnie ad vypłaty padatkaŭ u «Trajple», da jakoha maje dačynieńnie sam Čyž. Niepasrednyja dokazy hetamu akazalisia ŭ rasparadžeńni KDB 11 sakavika. Ciapier biznesmien taksama ŭtrymlivajecca pad vartaj u SIZA KDB pa abvinavačvańni ŭ ździajśnieńni złačynstva, praduhledžanaha č. 2 art. 243 KK (uchileńnie ad vypłaty padatkaŭ i zboraŭ u asabliva bujnym pamiery).
Ciapier čytajuć
Za minuły hod nasielnictva Biełarusi skaraciłasia jašče na 53 tysiačy čałaviek16
Kamientary