Zvolnieny namieśnik ministra ŽKH Anatol Šahun byŭ sakratarom upravy BNF, jaho charaktaryzujuć jak vielmi sumlennaha pracaŭnika
Učora stała viadoma, što namieśnika ministra ŽKH Anatola Šahuna źniali z pasady «ŭ suviazi z učynieńniem prastupka, niesumiaščalnaha sa znachodžańniem na dziaržaŭnaj słužbie».
Ciapier vyśviatlajucca dastatkova cikavyja padrabiaznaści bijahrafii spadara Šahuna. Akazvajecca, što naprykancy 1990-ch jon niejki čas zajmaŭ pasadu sakratara ŭpravy BNF.
«Heta było dzieści ŭ 1997—1999 hadach, uvieś čas byŭ u siadzibie na Varvašeni, — uzhadvaje frontaviec Alaksiej Kavalec. – Kali adbyŭsia raskoł u BNF, to jon adyšoŭ ad spravaŭ. Šahun simpatyzavaŭ Paźniaku i, mahčyma, byŭ siabram KCHP-BNF, ale hetaha dakładna ja skazać nie mahu».
«Spakojny, narmalny chłopiec. Kali jezdžu ŭ mašynie, to słuchaju radyjo, dyk nieadnarazova čuŭ intervju Anatola Šahuna — davaŭ ich zaŭsiody na biełaruskaj movie», — dzielicca svaimi dumkami spadar Kavalec.
Pamiataje Šahuna pa BNF i pierakładčyk, piedahoh Lavon Barščeŭski. «Heta dyscyplinavany i adkazny čałaviek — nie dziva, što jon vybiŭsia ŭ namieśniki ministra, bo nadzvyčaj dobry vykanaŭca. Jon staraŭsia nie śviacicca, ale razmaŭlaŭ na movie, dapamahaŭ, čym moh», — kaža Barščeŭski.
U «Moładzievaj frakcyi BNF» z Anatolem Šahunom pierasiakaŭsia i sustaršynia arhkamiteta BCHD Pavieł Sieviaryniec. «Heta nadzvyčaj prafiesijny čałaviek, ścipły, biełaruski. Intaresy dziaržavy jon stavić vyšej za svaje asabistyja intaresy», — ličyć Pavieł Sieviaryniec.
Kamientary