Łosik raskazaŭ, jak epična spaliŭsia padsadny aryštant u kamiery SIZA KDB
Usich astatnich paviali hałasavać na prezidenckija vybary, a jaho pa zakonie daviałosia pakinuć.
Błohier i były palitźniavoleny Ihar Łosik adreahavaŭ na artykuł «Našaj Nivy» pra byłoha bankira Mikałaja Cyrto. Źjavilisia śviedčańni, što były bankir moža być padsadnoj kačkaj dla važnych aryštantaŭ u «amierykancy».
Łosik piša, što, pa jaho nazirańniach, padsadnyja kački ŭ SIZA KDB — raspaŭsiudžanaja praktyka: «Aleksandrovič, Alaksiejenkaŭ, Paŭłoŭski: čamuści ja zaŭvažyŭ, što ŭ hetych ludziej padčas majho znachodžańnia tam proźviščy — vytvornyja ad imionaŭ».
Aleksandrovič, paźniej daviedaŭsia Łosik, u roznych kamierach raspaviadaŭ roznyja historyi pra svoj artykuł. Siadzieŭ užo kala dvuch hadoŭ jak minimum. Robić vyhlad, što zachaplajecca psichałahičnymi testami, nasamreč dziela čahości ŭsich u kamiery prosić ich prajści, a ankiety adpraŭlaje ŭ liście; jamu potym nibyta jahonaja sužycielnica dasyłaje vyniki. Testy roznyja: ad mietadałohii vyvučeńnia asoby na 500 pytańniaŭ da testa, jaki dajuć źniavolenym u amierykanskich turmach dla UDV.
Siadzić nibyta za ekspart uzbrajeńniaŭ u krainy Blizkaha Uschodu (Livan).
Vałodaje ŭ daskanałaści mnohimi movami: anhlijskaj, iŭrytam, arabskaj, tureckaj.
«Tamu da jaho «zakidvajuć» zamiežnikaŭ, kab jon daviedvaŭsia ad ich infarmacyju abo «raskručvaŭ» na pryznańnie viny. Ź im siadzieŭ niemiec Kryhier, jakomu prysudzili śmiarotnaje pakarańnie. Ź im siadzieŭ japoniec. Časta sychodzić na ceły dzień nibyta na apielacyi pa ekśpiertyzach (chacia sam užo asudžany), a faktyčna idzie da apieratyŭnikaŭ, raspaviadaje pra ŭsio i atrymlivaje novyja ŭvodnyja. Jamu dazvolena atrymlivać i adpraŭlać listy na iŭrycie. Były padpałkoŭnik abo pałkoŭnik KDB», — piša Łosik.
Druhi ž siadzielec, jakoha padazraje Łosik, spaliŭsia «vielmi epična» pa vinie supracoŭnikaŭ SIZA KDB.
Alaksiejenkaŭ zajaŭlaŭ, što jon padśledny pa artykule za machlarstva.
«Ale, kali pačalisia prezidenckija vybary, usim kamieram było zahadana napisać zajavu z prośbaj prahałasavać (paśla źmienaŭ u kanstytucyi ciapier u padślednych jość prava hałasavać u SIZA). Usie napisali, akramia mianie, bo ja byŭ asudžany; jon taksama napisaŭ. Ale ŭ dzień hałasavańnia ŭsich z kamiery vyvieli, akramia nas, i tut ja zrazumieŭ, što jon asudžany i chłusiŭ nakont artykuła», — raspaviadaje Łosik.
Jon kaža, što i raniej mužčynu padazravaŭ, bo toj kazaŭ, što siadzić niekalki miesiacaŭ, ale časam ahavorvaŭsia i raspaviadaŭ, jak bačyŭ, naprykład, Eduarda Babaryku. Šmat što nie sychodziłasia, i jamu daviałosia tłumačycca.
«Skazaŭ, što jon były pałkoŭnik KDB, padpisaŭ supracoŭnictva, i kab nie jechać na łahier, jamu prapanavali pracavać apieratyŭnym supracoŭnikam u kamierach. Za heta abiacali adpravić na UDV. Ale, jak ja zrazumieŭ, užo niekalki takich vyzvaleńniaŭ u jaho sarvalisia i jon sam pierastaŭ vieryć apieratyŭnikam, jakija ŭsio padkidvali jamu novyja zadańni», — piša Łosik.
Jon miarkuje, što ŭ SIZA KDB ci nie ŭ kožnaj kamiery pa takim supracoŭniku. I jany davoli efiektyŭna pracujuć.
«Mnohija, chto zajazdžaŭ u kamiery, paśla razmovy ź imi prymali dla siabie rašeńnie napisać jaŭku z pakajańniem abo pryznać vinu», — dadaje błohier.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»24
Kamientary