Na minułym tydni adzin z čarnasocienskich sajtaŭ aburyŭsia paviedamleńniem «Našaj Nivy» pra zbor podpisaŭ suprać ŭstanoŭki pomnika Alaksandru Nieŭskamu ŭ Viciebsku.
Va ŭjaŭleńni aŭtaraŭ, zryŭ hetaj «doŭhačakanaj padziei» — akt suprać «pravasłaŭnaj hramadskaści» i «padryŭ budaŭnictva» h.zv. Sajuznaj dziaržavy.
Tamu hetaja pakryŭdžanaja «pravasłaŭnaja hramadskaść» u asobie piaciorki čarnasocienskich aŭtaraŭ, siarod jakich nivodnaha viciebčuka, vykazała svajo nieadabram-s.
Razam ź piersanažami, jakija nazyvajuć siabie piśmieńnikami, historykami i «viadomymi žurnalistami», staić imia sapraŭdy žurnalista — viadučaha dziaržaŭnaha telekanała ANT, łaŭreata Premii prezidenta «Za duchoŭnaje adradžeńnie» Viačasłava Bandarenki.
U svaim kamientary čarnasocienskamu sajtu jon nazvaŭ fašystami tych, chto vystupaje suprać ustanoŭki pomnika Nieŭskamu ŭ Viciebsku.
«Ź vialikim sumam davodzicca nazirać, jak u peŭnych kołach Biełarusi nabiraje moc cichi, paŭzučy fašyzm, — pryvodzić słovy Bandarenki sajt. — Potym jon robicca hučnym, nachabnym, potym pierad im pačynajuć pasavać, sprabujuć załahodzić, robiać vyhlad, što jaho niama, nu a potym — čarhovaja Miunchienskaja damova, čarhovaja Praha i Polšča».
Vajna kulturnych upłyvaŭ, jakaja ciapier idzie ŭ Biełarusi — heta, pavodle Bandarenki, pieršy boj z takim fašyzmam.
«Ściarpim na hety raz — ściarpim va ŭsie nastupnyja», — piša viadučy ANT pra zbor podpisaŭ suprać pomnika Nieŭskamu i pryhadvaje historyju, kali ź biusta Puškinu prybrali šavinistyčny vierš «Klevietnikam Rośsii».
«Tady ŭłady zdali nazad, «załahodzili» — prybrali «nie tuju» cytatu», — apieruje Bandarenka terminam, jakim nazyvajuć palityku sajuźnikaŭ u dačynieńni da Hitlera.
Z pomnikam Nieŭskamu ŭłady, maŭlaŭ, taksama zajmajucca załahodžvańniem.
«Nie ŭ bajavym stroi, nie na kani. U mirnym vyhladzie, ź siamjoj… Ale nie. I heta nie toje. U jakim zaŭhodna vyhladzie — nie toje. Prosta tamu što nie Alhierd, nie Kiejstut, nie Mindoŭh, nie Vitaŭt. Voś hetych treba i ź siamjoj, i na kani, i pad kaniom…», — praciahvaje viadučy pra Nieŭskaha, a razvažaje dalej pra fašystaŭ.
«Jak jany prahnuć dziejničać u adkrytuju! Prosta skidać u Śvisłač, Dźvinu i inšyja reki ŭsio, što nie ŭpisvajecca ŭ ich karcinu śvietu. Ale pakul jany jašče zaścierahajucca, źbirajuć siły. Prosta ładziać isteryki, kali bačać u kiroŭcy aŭtobusa rasijski ściažok. I biahuć u milicyju ź lamantam pra toje, što heta kryŭdzić ichnija pačućci. Milicyja ciarpliva vyciraje ślozki isterykam i prosić kiroŭcu źniać ściažok. Pa zaviadzioncy, toj lituje nervy isteryka (ci naŭprost nie choča źviazvacca z durniem) i prybiraje. Chacia čamu, ułasna? U nas svabodnaja kraina, jaki ściažok zachaču, taki i paviešu. A nie padabajecca tabie — dyk vychodź z majho aŭtubusa i špacyruj pieššu».
Svaju dumku žurnalist skončvaje pryhadvańniem niadaŭniaj pajezdki ŭ Talin, dzie jon «niaredka» bačyŭ u aŭtobusach rasijskija ściahi, jakija «nie vyklikali abureńnia».
Mierkavańni inšych čarnasociencaŭ pryvodzić nie budziem, bo siarod ichnich arhumientaŭ — to štamp, to abraza: i ŭłady Viciebska ŭ ich «kretyny», i inicyjatary pomnika Alhierdu — «bydła» i «harłastyja marhinały».
My datelefanavalisia da Bandarenki i paprasili patłumačyć, kaho i čamu jon nazyvaje fašystami.
«U maim razumieńni fašyzm — heta nieciarpimaść da ŭsiaho, što vyhladaje nie tak, jak ty ličyš patrebnym, kab jano vyhladała», — patłumačyŭ žurnalist ANT.
Pavodle jaho, takija nieciarpimyja ludzi vielmi niebiaśpiečnyja, bo «spačatku jany dziejničajuć minimalnymi srodkami, a potym biarucca za zbroju».
My pierapytali ŭ łaŭreata premii «Za duchoŭnaje adradžeńnie», ci źjaŭlajucca nieciarpimymi čarnasociency, jakija nie saromiejucca ŭ vykazvańniach u dačynieńni da biełaruskich patryjotaŭ.
Bandarenka pryznaŭ, što tak.
«Tak, heta taksama prajavy nieciarpimaści, mnie hety pohlad absalutna nie blizki», — takuju acenku Bandarenka daŭ słovam inšych pradstaŭnikoŭ «pravasłaŭnaj hramadskaści».
Varta taksama skazać, što Bandarenka — aŭtar takich publicystyčnych tvoraŭ, jak «Zachodni ščyt Rasijskaj impieryi», «100 vialikich ruskich emihrantaŭ», «100 vialikich podźvihaŭ Rasii», «100 vialikich rasijskich akcioraŭ» dy inš.
Niadaŭna jon braŭ udzieł u prapahandysckim šoŭ Sałaŭjova na rasijskim TB, dzie nazvaŭ ukraincaŭ nacystami, a bajevikoŭ samaabvieščanych «respublik» — naščadkami savieckich aficeraŭ, jakija «adstojvali supolnuju radzimu».
«Zapuskajcie dalej saluty, a ja vykliču milicyju». Biełarusy spračajucca pra zabaronu na fiejervierki2
Kamientary