Biełaruska-indyjskim adnosinam nieabchodna nadać dadatkovy impuls. Pra heta Alaksandr Łukašenka zajaviŭ u Taškiencie na sustrečy z premjer-ministram Indyi Narendraj Damadardasam Modzi.
«Našy adnosiny raźvivajucca davoli dynamična. Ale ŭ apošnija hady ja adčuvaju, što patrebien dadatkovy impuls i šturšok da raźvićcia hetych adnosin», — cytuje Łukašenku pres-słužba prezidenta.
Jon adznačyŭ, što ŭ chodzie vizitu prezidenta Indyi ŭ Biełaruś, jaki adbyŭsia niekatory čas tamu, baki damovilisia ab tym, kab prykładna da 2018 hoda dasiahnuć uzroŭniu tavaraabarotu ŭ 1 młrd. dołaraŭ. «Naturalna, pad hety miljard nam treba stvaryć niejkuju ekanamičnuju darožnuju kartu, kab dasiahnuć hetaj miažy», — zajaviŭ kiraŭnik dziaržavy.
Pavodle jaho słoŭ, pamiž Biełaruśsiu i Indyjaj stvorana dastatkovaja dahavorna-pravavaja baza, kab adnosiny mahli paśpiachova raźvivacca. Baki taksama realizujuć šerah surjoznych dvuchbakovych prajektaŭ, u pryvatnaści ŭ śfiery farmakałohii i pa inšych kirunkach. «U nas vielmi dobra raźvivajecca supracoŭnictva pamiž akademijami navuk. Navukova-techničnyja prajekty ŭ śfierach enierhietyki, kosmasu, «zialonaj industryi», nana- i bijaindustryi, robatatechniki, farmaceŭtyki, atamnaj enierhietyki atrymali svajo raźvićcio pamiž Indyjaj i Biełaruśsiu, — adznačyŭ Łukašenka. — My surjozna rychtujemsia da taho, kab u listapadzie 2016 hoda naviedać mižnarodny handlovy kirmaš u Ńju-Deli, dzie ŭžo siońnia zapłanavana praviadzieńnie Dzion biełaruskaj navuki ŭ Indyi».
«Słovam, u nas jość dobryja kirunki supracoŭnictva, ale ja liču, što na hetym spyniacca nielha. Treba ruchacca napierad. I my, viadoma ž, čakajem vašaj bolšaj prysutnaści ŭ centry Jeŭropy. Dla vialikaj Indyi heta budzie niadrenna, i my hatovy realizavać vašy intaresy ŭ Biełarusi nastolki, nakolki heta vam vyhadna», — dadaŭ jon.
Sustreča kiraŭnikoŭ Biełarusi i Indyi prajšła ŭ Taškiencie, dzie siońnia jany voźmuć udzieł u pasiadžeńni savieta kiraŭnikoŭ dziaržaŭ — členaŭ Šanchajskaj arhanizacyi supracoŭnictva.
Kamientary