Ułady Polščy sabralisia demantavać bolš za 200 statuj, manumientaŭ i pamiatnych znakaŭ, uźviedzienych pa ŭsioj krainie ŭ hady kamunistyčnaha režymu, paviedamlaje Radyjo Polšča.
«Niama pryčyn prasłaŭlać pomniki Čyrvonaj armii, jakaja dvojčy ŭryvałasia ŭ Polšču i niasie adkaznaść za šmatlikija paślavajennyja złačynstvy», — zajaviŭ na pres-kanfierencyi vice-prezident dziaržaŭnaha Instytuta nacyjanalnaj pamiaci Polščy Pavieł Ukielski.
Adkryćcio parku namiečanaje na 17 vieraśnia 2017 hoda — u 78-ju hadavinu napadu SSSR na Polšču.
«My chacieli b, kab t.zv. pomniki padziaki Čyrvonaj Armii byli sabranyja ŭ adnym miescy, dzie možna budzie raskazać pra kantekst, historyju ich źjaŭleńnia i pra toje, što jany aznačali. Heta miesca my papiarednie nazvali muziejem pad adkrytym niebam i pryniali rašeńnie raźmiaścić hety muziej u horadzie Borna-Sulinova. Heta simvaličny z punktu hledžańnia historyi nasieleny punkt, tamu što niekalki dziasiatkaŭ hadoŭ jon byŭ zakryty dla palakaŭ. Tam raźmiaščalisia bujnyja padraździaleńni savieckaj armii», — skazaŭ Pavieł Ukielski.
Pa padlikach Instytuta nacyjanalnaj pamiaci, pieranosu padlahajuć 229 manumientaŭ. Ukielski zapeŭnivaje, što pomniki, uźviedzienyja na vajennych mohiłkach, nie buduć demantavanyja.
Pa zakonie, uchvalenym polskim uradam, rašeńnie ab pieranosie savieckich pomnikaŭ zmohuć prymać miascovyja ŭłady.
Ukielski taksama adznačyŭ, što pa pytańni stvareńnia muzieja polski bok nie pravodziŭ kansultacyj z Rasijaj:
«Polskaja publičnaja prastora źjaŭlajecca elemientam polskaj suvierennaści, niama nijakaj nieabchodnaści kansultavać takoha kštałtu dziejańni ni z adnym z našych susiedziaŭ. Damova z rasijskim bokam tyčycca tolki miescaŭ pachavańniaŭ i pamiaci, heta značyć mohiłak, i nie datyčyć simvaličnych pamiatnych miescaŭ, pra jakija idzie havorka ŭ našaj akcyi».
Na dumku dyrektara biuro narodnaj adukacyi Instytuta nacyjanalnaj pamiaci Andžeja Zavistoŭskaha, u śpiecyjalnym parku naviedvalniki ŭbačać savieckija pomniki «ŭ pravilnym histaryčnym kantekście».
«Takija navučalnyja parki i muziei isnujuć i ŭ inšych dziaržavach — u Litvie, Vienhryi i navat u samoj Rasii», — skazaŭ polski historyk.
Rašeńni kiraŭnictva postkamunistyčnych krain pra pazbaŭleńnie ad simvałaŭ savieckaj epochi tradycyjna vyklikajuć mocnuju niezadavolenaść u Maskvie.
Rasijski MZS raniej nazyvaŭ płany znosu pomnikaŭ savieckim sałdatam vandalizmam i sprobaj falsifikacyi vynikaŭ Druhoj suśvietnaj vajny, piša VVS.
Ambasada Rasii ŭ Varšavie zajaviła ahienctvu Rejter, što rychtuje adkaz na rašeńnie polskaha ŭrada.
Rasija ličyć miemaryjały, pryśviečanyja savieckim sałdatam, daninaj pamiaci achviaram, jakija panios Saviecki Sajuz pry vyzvaleńni Jeŭropy ad nacystaŭ. Adnak mnohim palakam hetyja pomniki słužać napaminam pra ŭvarvańnie Hitlera i Stalina ŭ Polšču ŭ 1939 hodzie i pra bolš čym čatyry dziesiacihodździ panavańnia kamunistyčnaha režymu.
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary