Sakretnaja słužba ZŠA moža nie spravicca z abaronaj kandydataŭ u prezidenty
Sakretnaja słužba ZŠA — United States Secret Service (USSS) — adnosna nievialikaja amierykanskaja fiederalnaja śpiecsłužba, hałoŭnaj adkaznaściu jakoj jość abarona kiraŭnikoŭ dziaržavy i ich siemjaŭ, a taksama kandydataŭ u prezidenty.
Śpiecsłužba była stvoranaja adrazu paśla zabojstva prezidenta Aŭraama Linkalna ŭ 1865 hodzie, a jaje samaj vialikaj niaŭdačaj stała, viadoma, zabojstva prezidenta Džona Kienedzi amal roŭna praz 100 hod.
Ciapier Sakretnaja słužba abaraniaje amal aficyjnaha kandydata ad respublikancaŭ Donalda Trampa, a taksama demakrataŭ Bierni Sandersa i Chiłary Klintan.
Adnak prezidenckaja kampanija ŭ ZŠA stała nastolki haračaj, što sił 3200 śpiecyjalnych ahientaŭ moža prosta być niedastatkova, kažuć ekśpierty, jakich cytuje foxnews.com.
Sacyjalnyja miedyja poŭnyja pahrozami, vykazvańniami nianaviści, zaklikami da hvałtu.
«Ahienty ŭvieś čas pracujuć u zonie niebiaśpieki, pad vielmi vysokim ciskam», — kaža Den Bandžyna, jakija adsłužyŭ u śpiecsłužbie 12 hod.
U hetym miesiacy ŭžo byŭ zatrymany brytanski hramadzianin, jaki pryznaŭsia, što chacieŭ zabić Trampa. 20-hadovy Majkł Styvien Sendfard byŭ aryštavany, kali namahaŭsia adabrać zbroju ŭ palicejskaha.
Ale vielmi časta na mitynhach respublikanskaha kandydata źjaŭlajucca jahonyja praciŭniki, uźnikajuć sprečki i bojki.
Viasnoj ahientam Sakretnaj słužby pryjšłosia kinucca na abaronu Trampa, kali na scenu sprabavaŭ prabicca nieviadomy čałaviek. Jašče raniej śpiecahienty paraili Trampu admianić mitynh u Čykaha z-za pahroz jahonamu žyćciu.
Tady dyrektar śpiecsłužby Džozief Kłensi zajaviŭ, što jaje treba nieadkładna pavialičyć, bo kolkaść ahientaŭ prosta niedastatkovaja, kab adsočvać, analizavać i papiaredžvać usio novyja pahrozy.
Krynica ŭ dziaržaŭnym aparacie paviedamiła foxnews.com, što Sakretnaja słužba ŭžo prosić ab dapamozie ludźmi inšyja pravaachoŭnyja struktury krainy, adnak pakul hetaj dapamohi taksama niedastatkova.
Akramia Sakretnaj słužby, Tramp sam najmaje pryvatnyja achoŭnyja słužby dla zabieśpiačeńnia svaich masavych mierapryjemstvaŭ, da taho ž časam niefarmalnyja abjadnańni prychilnikaŭ nieadnaznačnaha kandydata dobraachvotna prychodziać abaraniać mitynhi z ułasnaj zbrojaj.
Adnak dziaržaŭnaja śpiecsłužba nie prymaje dapamohi ad niedziaržaŭnych struktur, kažuć krynicy.
Ciapier čytajuć
Biełaruska nabiła na ciele partrety Łukašenki i jaho synoŭ, Umki, Pucina dy Si Czińpina12
Kamientary