U Rasatamie paćvierdzili hatoŭnaść zamianić korpus reaktara dla pieršaha enierhabłoka Biełaruskaj AES paśla taho, jak Minenierha Biełarusi aficyjna paviedamiła pra svajo žadańnie rasijskamu boku. Rašeńnie pra zamienu korpusa reaktara pryniała mižviedamasnaja kamisija pa ŭźviadzieńniu BiełAES, paviedamlaje «Kommiersant'».
U Rasatamie z pazicyjaj Minska pahadzilisia, daŭšy zrazumieć, što ličać pryčynaj zamieny nie pytańnie biaśpieki, a hramadskaje mierkavańnie, piša vydańnie.
«My ŭžo zajaŭlali, što pastavimsia da takoha rašeńnia z pavahaj, bo razumiejem, ź jakoj pryčyny jano moža być pryniataje. Hramadskaja prymalnaść atamnaj enierhietyki — nie mienš važny pryjarytet, čym jaje biaśpieka. Budziem abmiarkoŭvać z zakazčykam detali, źviazanyja ź jaho realizacyjaj», — zajavili ŭ Rasatamie.
Paśla incydentu kantrolnyja pravierki korpusa reaktara pravodzili śpiecyjalisty hienkanstruktara i vytvorcy. Adnak Minsk jany nie zadavolili. Razhledzieŭšy ich, Dziaržatamnahlad «nie vyjaviŭ paćviardžeńnia biaśpieki» korpusa, adznačyŭ načalnik adździeła kamunikacyj i hramadskaj infarmacyi Aleh Sobaleŭ.
Namieśnik staršyni Rasatama Alaksandr Łokšyn raniej zajaŭlaŭ, što pry žadańni biełaruskaha boku zamienu zrobiać: na pieršym błoku budzie ŭstalavany korpus reaktara, jaki pryznačaŭsia dla druhoha błoka.
— Ale heta rašeńnie zakazčyka, viadoma, pryviadzie da peŭnaha zruchu hrafika zaviaršeńnia budaŭnictva enierhabłoka, — dadaŭ top-mieniedžar Rasatama.
Jak adznačaje «Kommiersant'», pakul nie jasna, na kaho laža abaviazacielstva apłacić mahčymyja vydatki.
Pra toje, što Biełaruś vyrašyła zamianić korpus reaktara napiaredadni paviedamiŭ kiraŭnik Minenierha Uładzimir Patupčyk. Pry hetym, pavodle jaho słoŭ, pytańnie koštu zamieny abstalavańnia pakul źjaŭlajecca pradmietam pieramovaŭ z rasijskim bokam.
Kamientary