U noč na subotu hrupa nieviadomych kinuła na terytoryju pasolstva Rasii ŭ Kijevie dymavuju šašku i vypuściła niekalki zaradaŭ pa budynku z salutnaj ustanoŭki.
Incydent adbyŭsia kala hadziny nočy. Vidavočcy kažuć, što akcyja doŭžyłasia niekalki chvilinaŭ.
U pasolstvie zajaŭlajuć, što streły z salutnaj ŭstanoŭki byli nakiravanyja niepasredna na budynak dypmisii. Na vykładzienym u internet videa bačna, što pietardy traplajuć u fasad budynka.
Paviedamlajecca, što napadnikaŭ było kala dvaccaci. Na razhornutym imi baniery vidać nazvu radykalnaj nacyjanalistyčnaj hrupoŭki «S14». Na jaje staroncy ŭ sacsietkach paviedamlajecca, što heta była «kreatyŭnaja akcyja pratestu suprać vybaraŭ u Dziarždumu na terytoryi akupavanaha Kryma i dypustanovach RF u Kijevie, Adesie, Charkavie i Lvovie».
U samim pasolstvie zajavili, što budynak moh zaharecca. «U rajonie hadziny nočy nieviadomyja kinuli na terytoryju ambasady dymavuju šašku i abstralali budynak pry dapamozie salutnaj ustanoŭki. Streły byli nakiravanyja niepasredna na budynak dypmisii. […] Pa ščaślivaj vypadkovaści uzharańnia nie adbyłosia», - skazaŭ surazmoŭca TASS. «Miascovaja palicyja napadnikaŭ nie zatrymała», — dadali ŭ pasolstvie.
Napad adbyŭsia napiaredadni niadzielnych vybaraŭ u Dziarždumu Rasii.
Kamientary