U Minsku 21 vieraśnia padpisanaje ramačnaje rašeńnie trochbakovaj kantaktnaj hrupy pa situacyi na paŭdniovym uschodzie Ukrainy ab raźviadzieńni sił i srodkaŭ. Pra heta na svajoj staroncy ŭ fejsbuku paviedamlaje Dar`ia Olifier, pres-sakratar pradstaŭnika Ukrainy ŭ kantaktnaj hrupie Leanida Kučmy.
«Ukraina paśladoŭna vykonvaje abaviazacielstvy, uziatyja na siabie ŭ ramkach Minskich damoŭlenaściaŭ i stroha prytrymlivajecca režymu cišyni. Jak praciah hetaha ŭkrainski bok padpisaŭ dadzienaje ramačnaje rašeńnie, kab zabiaśpiečyć vykanańnie Minskich pahadnieńniaŭ z boku asobnych rajonaŭ Danieckaj i Łuhanskaj abłaściej», — paviedamiła Olifier.
Dakumient praduhledžvaje deeskałacyju ŭ rajonie linii sutyknieńnia i faktyčna stvaraje ŭmovy, u jakich strałkovaja zbroja nie moža vykarystoŭvacca dla abstrełaŭ. U toj ža čas ramačnaje rašeńnie praduhledžvaje poŭnaje vykanańnie papiarednich damoŭlenaściaŭ trochbakovaj kantaktnaj hrupy ab adviadzieńni ź linii sudtyknieńnia harmat kalibram mienš za 100 mm.
«U adpaviednaści z ramačnym rašeńniem ab raźviadzieńni sił i srodkaŭ SMM ABSIE ździajśniaje «na pastajannaj asnovie manitorynh i vieryfikacyju pracesu raźviadzieńnia sił i srodkaŭ na ŭzhodnienych učastkach raźviadzieńnia», — napisała Alifier. — Varta asabliva zaznačyć, što hetaje raźviadzieńnie zapłanavanaje tolki na troch učastkach z dakładna vyznačanymi kaardynatami. U toj ža čas ukrainski bok ličyć, što padčas implemientacyi hetaha ramačnaha rašeńnia mohuć być adpracavanyja padychody da mahčymaha raźviadzieńnia sił i srodkaŭ uzdoŭž usioj linii raźmiežavańnia».
Olifier padkreśliła, što pry padrychtoŭcy dakumienta ŭkrainski bok całkam vyklučyŭ sproby volnaha tłumačeńnia paramietraŭ i statusu linii raźmiežavańnia, bo ŭ tekście ramačnaha rašeńnia zafiksavana, što hety dakumient prymajecca ŭ praciah pratakoła ad 5 vieraśnia 2014 hoda, miemaranduma ad 19 vieraśnia 2014 hoda, kompleksu mier pa vykanańni Minskich pahadnieńniaŭ ad 12 lutaha 2015 hoda.
Ad Ukrainy ramačnaje rašeńnie padpisaŭ Leanid Kučma, ad ABSIE — Marcin Sajdzik, ad Rasii — Barys Hryzłoŭ.
Raźviedka ZŠA: Biełaruś stała pieradavym vajskovym płacdarmam Rasii24
Kamientary