Ravaryst ź bitaj Anatol Hrynkievič, jaki atrymaŭ piać hadoŭ kałonii ŭzmocnienaha režymu, vyrašyŭ abskardzić svoj prysud. Hetuju infarmacyju paćvierdzili ŭ Minskim haradskim sudzie. Apielacyju mužčyna napisaŭ sam. Choć paśla pracesu jaho advakat kazaŭ pra toje, što nastojvać na pierahladzie bok abarony nie budzie.
12 vieraśnia sud Frunzienskaha rajona Minska pryznaŭ Anatola Hrynkieviča vinavatym u asabliva złosnym chulihanstvie (č. 3 art. 339 KK). Maksimalny termin pa hetym artykule — 10 hadoŭ pazbaŭleńnia voli. Prakuror prasiła dla mužčyny 7 hadoŭ turmy, advakat nastojvaŭ na pakarańni biez pazbaŭleńnia voli.
Sud pryznačyŭ Hrynkieviču 5 hadoŭ kałonii i 10 tysiač rubloŭ maralnaj kampiensacyi paciarpiełamu chłopcu.
— Skarha ad Anatola Hrynkieviča pastupiła ŭ sud Frunzienskaha rajona ŭ dziesiacidzionny termin paśla atrymańnia im kopii prysudu. U Minski haradski sud dakumienty jašče nie pastupili. Data pracesu budzie pryznačanaja na praciahu miesiaca, spravu budzie razhladać kalehija sudździaŭ, — patłumačyła pres-sakratar Minharsuda Anastasija Šilvian.
Siońnia brat Anatola Hrynkieviča apublikavaŭ na sajcie change.org pietycyju i źbiraje podpisy pad patrabavańniem źmiakčyć prysud. Svajaki ličać pakarańnie ŭ piać hadoŭ kałonii niesuraźmiernym złačynstvu. Paciarpieły atrymaŭ mienš ciažkija cialesnyja paškodžańni:
«Atrymlivajecca, što za lohkaje strasieńnie čałaviek raspłačvajecca 5 hadami žyćcia? Piać hadoŭ biez mahčymaści hadavać dačku, bačycca ź blizkimi, karmić svaju siamju — heta suraźmierna zroblenamu?» — zadajecca pytańniem Siarhiej, brat Anatola Hrynkieviča.
U pietycyi jon nie admaŭlaje viny brata i kaža, što vyrašać kanflikt pry dapamozie bity nie było nijakaj patreby.
«Adnak ni prakuror, ni sudździa, nie źviarnuli svaju ŭvahu na pačatak kanfliktu i dziejańni paciarpiełaha, choć u ich hetak ža ŭhledžvajecca chulihanstva i niepavaha da hramadstva», — havorycca ŭ zvarocie.
Kamientary