Były premjer-ministr, a ciapier staršynia Savieta respubliki Michaił Miaśnikovič vykazaŭ pasłu Turkmienistana ŭ Biełarusi Nazarhuły Šahułyjevu niezadavolenaść z nahody składanaściaŭ, ź jakimi sutykajucca biełaruskija rabočyja pry budaŭnictvie Harłykskaha horna-abahačalnaha kambinata. Pra heta havorycca ŭ paviedamleńni pres-słužby Savieta respubliki.
Alaksandr Łukašenka daručyŭ Miaśnikoviču jašče ŭ bytnaść premjeram kuryravać budaŭnictva Harłykskaha HAKa ŭ Turkmienistanie. Toj nie adzin raz byvaŭ na abjekcie. A dniami Miaśnikovič zaprasiŭ pasła Nazarhuły Šahułyjeva na razmovu i «vykazaŭ krajniuju zaniepakojenaść u suviazi z praciahłym nievykanańniem turkmienskim bokam uziatych na siabie finansavych i inšych abaviazacielstvaŭ pa realizacyi nazvanaha prajekta».
«Było padkreślena, što hety faktar, a taksama šmatlikija pieraškody, u tym liku subjektyŭnaha charaktaru, ź jakimi sutykajucca biełaruskija budaŭniki, niehatyŭna ŭpłyvajuć na chod budaŭnictva», skazana ŭ pres-relizie.
Staršynia Savieta Respubliki padkreśliŭ nieabchodnaść «pryniaćcia Ašchabadam šerahu nieadkładnych mier u metach paśpiachovaha zaviaršeńnia budaŭnictva kambinata».
U studzieni 2010 hoda «Biełharchimpram» padpisaŭ ź dziaržaŭnym kancernam «Turkmienchimija» kantrakt na budaŭnictva biełaruskimi śpiecyjalistami pad kluč horna-abahačalnaha kambinata pa vypusku kalijnych uhnajeńniaŭ mahutnaściu 1,4 młn t u hod na bazie Harłykskaha radovišča. Hetaje radovišča raźviedanaje jašče ŭ 60-ch hadach minułaha stahodździa, ale cikavaść da jaho prajavili tolki niadaŭna, kali ŭhnajeńni vyraśli ŭ canie. Spačatku pracu pa śvidravańni i budaŭnictvie rudnika turkmienskija śpiecyjalisty sprabavali vykanać samastojna, ale, sutyknuŭšysia z šeraham składanaściaŭ, zaklikali na dapamohu biełarusaŭ. Ahulnaja suma kantraktu składaje 1 młrd dalaraŭ.
Kamientary