Jak tatalna padtrymlivać rasiejskuju zbornuju

Da naboru žaleznych, jak Marharet Tetčer, arhumentaŭ, jakija harantujuć nam viečna nizkija košty na rasiejski haz («NATO — biaka», ahulnaja słavianskaja kroŭ, akopy Druhoj suśvietnaj), u Bieraści dadaŭsia novy: «biełarusy tatalna padtrymlivali rasiejskuju zbornuju na Eŭra'2008». Zastałosia tolki napoŭnić tezis kankretnym źmiestam.

26.08.2008
10.45

Maskva. Pierad ofisam «Hazpromu».

— Raz‑dva: «Ra‑sieja, ŭpie‑rod! Nas‑taŭ tvoj če‑rod!» Kamiakoŭ, ty jak u trubu dudziš? Praź piać chvilin pieramovy pa hazu, a ty, prabač, niejkija puki vydaješ. Jak ty źbirajeśsia ŭvohule košt $140 za tysiaču kuboŭ utrymać? Što? Prapanuješ zabacać usioj delehacyjaj baryniu pad bałałajku?! Kaliści tančyŭ u Domie pijaneraŭ. Ty jašče prapanuj pierad Hrefam scenu pieršaha bału Natašy Rastovaj z «Vajny i miru» ŭ rolach razyhrać. Nie prakanaje, Kamiakoŭ! Zaraz rasiejcaŭ možna tolki na futbole razvodzić. Tak, ministry, u nas jašče jość piać chvilin. Paŭtorym kryčałku. I‑i‑i‑i: «Ra‑sieja, ŭpie‑rod! Nas‑taŭ tvoj če‑rod!» Nia čuju traščotak: «Ale‑ale‑ale‑ale». Dobra. Vyšej transparant. Dzie truba? Stop! Kamiakoŭ, blin… Što? Čas iści. Nu, pajšli…

12.50
Maskva. Ofis «Hazpromu».

— Jakija 200 baksaŭ za tysiaču kubametraŭ? Pamiłujcie, spadar Href. My ž u červieni 2008‑ha razam pieražyvali za rasiejskuju zbornuju! My nie hladzieli, chto rasiejec, chto biełarus. Dla nas na pieršym miescy było tolki kab hoł zabili. 200 baksaŭ! Z vas paśla hetaha ŭvieś śviet śmiajacca budzie. Ładna, pavyšajcie! Ładna! Kidajcie tych, chto hniŭ u červieni 2008‑ha na trybunach. Jak ža tak? My ž na Eŭra tatalna ad rasiejskaj zbornaj fanacieli! Hladzicie sami: «Ra‑sieja, ŭpie‑rod! Nas‑taŭ tvoj če‑rod! Ale‑ale‑ale‑ale»…

14.00
Maskva. Ofis «Hazpromu».

— Ra‑sieja, ŭpie‑rod! Nas‑taŭ tvoj če‑rod! Ra‑sieja, ŭpie‑rod! Nas‑taŭ tvoj če‑rod! Ale‑ale‑ale‑ale. Ra‑sieja, ŭpie‑rod! Nas‑taŭ tvoj če‑rod! Ale‑ale‑ale‑ale. Darečy, ty za kaho baleješ, Href? Za Rasieju? A voś my zaraz pravierym. U jakim miescy na poli na 28‑j chvilinie ŭ matčy z Hrecyjaj byŭ Aršanin? Što maŭčyš? Chłopcy, hety pierac, zdajecca, ź inšaj firmy! Zub daju, što jon za turkaŭ! Mačy jaho, pacany! Na! Na! Voś tabie za Rasieju! Kamiakoŭ, što staiš? Daj jamu truboju. Vo tak. Što? Achoŭniki? Šuchier! Ciakajma, chłopcy! Pašancavała tabie, turak.

20.00
U ciahniku Maskva—Miensk.

— M‑da, krychu nie dacisnuli… Ale čotki atrymaŭsia vyjezd! I nikudy Href ad nas nia dzieniecca. Nastupny raz paśla Alimpijady pajedziem. A nu, pacany, davajcie našu kryčałku: «Ra‑sieja, ŭpie‑rod! Nas‑taŭ tvoj če‑rod! Ale‑ale‑ale‑ale»…

• 0
• 0
• 0
• 0
• 0
• 0
• 0
• 0