MZS Biełarusi zajaŭlaje, što viadziecca padrychtoŭka sustrečy Alaksandra Łukašenki ź Viktaram Juščankam.
Pra heta paviedamiŭ 26 červienia na bryfinhu pres‑sakratar MZS Biełarusi Andrej Papoŭ.
Pavodle jaho słoŭ, biełaruski i ŭkrainski baki abmiarkoŭvajuć, u pryvatnaści, «uzajemaprymalnuju datu sustrečy dvuch prezidentaŭ». «Ab kankretnych terminach kazać pakul dačasna, — zaznačyŭ A.Papoŭ. — Padrychtoŭka takoj sustrečy i ŭzhadnieńnie terminaŭ praciahvajecca».
Jak padkreśliŭ pres‑sakratar, «biełaruska‑ŭkrainski dyjałoh vielmi intensiŭny, asabliva ŭ handlova‑ekanamičnaj śfiery». Pavodle jaho słoŭ, tavaraabarot za minuły hod pieravysiŭ 3 młrd. dołaraŭ ZŠA pry nievialikim admoŭnym salda dla Ukrainy, i heta śviedčyć ab uzajemavyhadnym charaktary ekanamičnaha aśpiekta supracoŭnictva.
«My pracujem i nad uščylnieńniem palityčnych kantaktaŭ», — padkreśliŭ A.Papoŭ.
Infarmacyjnaje ahienctva Ukrainskija naviny siońnia raspaŭsiudziła paviedamleńnie ab mahčymym vizicie 27 červienia va Ukrainu prezidenta Biełarusi Alaksandra Łukašenki dla pieramoŭ z kiraŭnictvam krainy. Ahienctva spasyłajecca na krynicu ŭ pasolstvie Ukrainy ŭ Polščy, jakaja paviedamiła, što ministr zamiežnych spraŭ Ukrainy Uładzimir Ahryzka admianiŭ zapłanavany na 27 červienia vizit u Polšu ŭ suviazi z mahčymym vizitam Łukašenki va Ukrainu.
Raniej niekatoryja ŚMI taksama paviedamlali, što damoŭlenaść ab sustrečy Łukašenki i Juščanki 27 červienia ŭ Čarnihavie była dasiahnutaja na minułym tydni ŭ Minsku padčas pieramoŭ pieršaha namieśnika ministra zamiežnych spraŭ Biełarusi Ihara Pietryšenki z namieśnikam kiraŭnika MZS Ukrainy Kanstancinam Jelisiejevym.
Kamientary