Kampanija «Havary praŭdu» vyrašyła stać palityčnaj partyjaj
Delehaty forumu hramadzianskaj kampanii «Havary praŭdu» 12 listapada vyrašyli pačać praceduru stvareńnia adnajmiennaj palityčnaj partyi. Praces stvareńnia palityčnaj struktury moža zaniać da dvuch hadoŭ.
«Kampanii «Havary praŭdu» para stać na novy etap raźvićcia. Heta padrychtuje nas da reformaŭ. Siońniašniaje rašeńnie ab stvareńni partyi — heta rašeńnie ab tym, da čaho my rychtujemsia, — uziać uładu ŭ svaje ruki», — zajaviła sustaršynia arhanizacyi Taćciana Karatkievič.
«Heta budzie centrysckaja partyja, partyja dla čałavieka, jaki płacić padatki, ale [zaraz] nie moža daviedacca, na što jany iduć. Mnie zdajecca, my pabudujem unikalnuju partyju, partyju intaresaŭ miljonaŭ, partyju, jakaja vybiraje nie kanflikty, a jakaja adkrytaja dla supracoŭnictva i ŭzajemadziejańnia», — dadaŭ jašče adzin sustaršynia arhanizacyi Andrej Dźmitryjeŭ.
Pry hetym aktyvist Siarhiej Vaźniak zaznačyŭ, što stvareńnie partyi nie budzie aznačać zakryćcio arhanizacyi «Havary praŭdu». Pavodle jaho słoŭ, budzie mahčymaje padvojnaje členstva, albo členstva ŭ partyi ci ab`iadnańni.
U suviazi z mahčymym źmianieńniem vybarčaj sistemy stratehija «Havary praŭdu» da 2020 hoda, jakaja razhladałasia na forumie, praduhledžvaje nieabchodnaść pryniaćcia rašeńnia ab padrychtoŭcy da transfarmacyi ŭ palityčnuju partyju kolkaściu nie mienš za 1.200 čałaviek.
Prahramnaja asnova partyi, havorycca ŭ stratehii, mahła b vyhladać nastupnym čynam: viartańnie ŭłady na miescy i ŭmacavańnie miascovaha samakiravańnia, raźvićcio elektronnaha ŭrada; raźvićcio małoha i siaredniaha biźniesu, inavacyjnych padychodaŭ u pramysłovaści i sielskaj haspadarcy; realnaja sacyjalnaja abarona nasielnictva; niejtralitet, členstva ŭ Saviecie Jeŭropy, bazavy dahavor ab supracoŭnictvie ź ES.
Kamientary