Hienieralny dyrektar AAT «BiełAZ-chołdynh» Piotr Parchomčyk skazaŭ u intervju prahramie «Kontury» telekanała ANT, pakazanym uviečary 27 listapada, što BiełAZ hatovy stać łakamatyvam usiaho biełaruskaha mašynabudavańnia. Pra heta paviedamlaje BiełaPAN.
«Ambicyi ŭ nas davoli surjoznyja», — skazaŭ jon.
Parchomčyk raspavioŭ, što ŭ kampanii jość kancepcyja «2D». «Pieršaje «D» — heta dyviersifikacyja biznesu. Druhoje — dyviersifikacyja rynkaŭ, što patrabuje prezident», — patłumačyŭ jon.
U kampanii, pavodle słoŭ hiendyrektara, sprabujuć stvaryć novyja napramki biznesu, akramia vytvorčaści karjernych samazvałaŭ. U Starych Darohach zaviaršajecca budaŭnictva nievialikaha pradpryjemstva — dadatkova 1.500 kv. m vytvorčych płoščaŭ — pa vypusku frykcyjnych vyrabaŭ: tarmaznych kałodak dla «BiełAZaŭ», sielskahaspadarčaj techniki. Raniej hetyja kamplektujučyja zavozilisia z Ukrainy. Budaŭnictva zavoda płanujecca zaviaršyć da kanca hetaha hoda.
U Słucku stvarajecca pradpryjemstva pa padjomna-transpartnym abstalavańni. Heta — mastavyja i kazłovyja krany ad 6 da 240 ton. «Kali budzie drenna ŭ halinie prodažu karjernych samazvałaŭ, my budziem vyžyvać na prodažy inšaha abstalavańnia», — zapeŭniŭ Parchomčyk. Jon taksama nahadaŭ, što BiełAZ źjaŭlajecca hałoŭnym akcyjanieram u prajekcie «Biełdžy» pa vytvorčaści lehkavych aŭtamabilaŭ.
Piotr Parchomčyk raspavioŭ, što ŭ 2017 hodzie budzie pakazany pieršy samazvał, jaki pracuje na hazie. «Pakul u našych kankurentaŭ takoha niama», — zajaviŭ jon.
U adkaz na pytańnie pra situacyju na pradpryjemstvie hiendyrektar paviedamiŭ, što «zarobak nabližajecca da 900 rubloŭ». U śniežni jon budzie składać 930-950 rubloŭ. I ŭ studzieni-lutym, na dumku Parchomčyka, zadača prezidenta pa zarobku ŭ 500 dalaraŭ u ekvivalencie budzie vykananaja.
Kamientary