Byŭ ci nie byŭ seksizm? Fieministki aburylisia rekłamaj Mark Formelle
«Centr pa prasoŭvańni pravoŭ žančyn — jaje prava» źviarnuŭ uvahu na rekłamu nižniaj bializny ad vytvorcy adzieńnia Mark Formelle.
«Adna z tem, pra jakuju my hatovyja havaryć hučna i ŭpeŭniena, — heta seksizm u rekłamie. I nam by vielmi chaciełasia, kab kožnaja i kožny ŭ Biełarusi stali bolš uvahi nadavać hetaj temie, nazirać i fiksavać parušeńni. Tak, nam pactupiŭ zvarot Taćciany Kuźniacovaj, a za im — jašče šerahu biełarusak, jakija ličać novuju rekłamu Mark Formelle seksisckaj i prynižalnaj dla žančyn. U rekłamie žančyna demanstrujecca jak seksualny abjekt, malujecca ŭ małanaturalnych, spakušalnych pozach i vobrazach. Biezumoŭna, u rekłamie bializny moža vykarystoŭvacca hołaje cieła (jak žanočaje, tak i mužčynskaje), adnak jano nie pavinna «pradavacca» razam ź bializnaj i vystaŭlacca ŭ jakaści seksualnaha abjekta. Mienavita tamu my adpravili ŭ kampaniju TAA «Farmel» zvarot z prośbaj spynić vykarystańnie dadzienaj rekłamy ciapier i ŭ budučyni nie źviartacca da takich pryjomam dla pavieličeńnia prodažaŭ», — havorycca na staroncy pravaabarončaj arhanizacyi ŭ fejsbuku.
Heta nie adzinaja rekłama, jakaja vyklikała abureńnie pradstaŭnic «Centra prasoŭvańnia pravoŭ žančyn». Naprykład, šmat pytańniaŭ vyklikała rekłama chrena AVS «Chren pavinien stajać u kožnaha… na stale». Heta rekłama była azdoblenaja žanočym azadkam.
Niekatoryja miarkujuć, što vielmi ciažka rekłamavać žanočuju bializnu, nie vykarystoŭvajučy ŭ rekłamie paŭaholenaje žanočaje cieła, a mužčynskuju — biez mužčynskaha.
Mark Formelle dastatkova chutka daŭ aficyjny adkaz, jaki byŭ nadrukavany na sajcie marketing.by. Dyrektar «Farmel» Śviatłana Siparova adznačyła: «Vaša mierkavańnie ab pierabolšvańni seksualnaj nakiravanaści rekłamnych vobrazaŭ žančyn u hetaj rekłamie nie adpaviadaje rečaisnaści, bo ni abstanoŭka, jakaja vykarystoŭvajecca ŭ rekłamie (kuchnia), ni dziejańni žančyny (sumiesnaje pryhatavańnie ježy z mužam i jaje dehustacyja) nie mohuć być źviazanyja z seksualnym padtekstam».
Taksama kampanija adznačaje, što «abarona pravoŭ žančyn — vielmi važnaja i adkaznaja sprava». Sama Śviatłana Siparova adznačałasia ŭ 2015 hodzie mižnarodnaj premijaj «za prasoŭvańnie hiendarnaj roŭnaści ŭ kamiercyjnaj kampanii».
Kamientary