Internet-resurs «Infarmnapałm» apublikavaŭ uzłamanuju elektronnuju pierapisku pamiž žurnalistam Arciomam Buziłam i jahonymi kuratarami z Rasii. Cikavaść ujaŭlajuć biełaruskija proźviščy, što ŭspłyvajuć u hetaj pierapiscy.
Buziła — heta žurnalist z Adesy, jaki byŭ ahientam upłyvu Kramla va Ukrainie, atrymaŭ turemny termin, ale byŭ vypuščany pavodle «zakona Saŭčanki» i paśla hetaha vyjechaŭ u Rasiju.
Kuratary Buziły, miarkujučy pa pierapiscy, — ludzi, blizkija da kramloŭskaha palittechnołaha Uładzisłava Surkova: praź ich išli rekamiendacyi, finansavańnie dy inšaje.
Pa infarmacyi ŭkrainskich chakieraŭ, ź listapada 2016 hoda Buziła padklučyŭsia da infarmacyjnaj kampanii pa Biełarusi.
Niejki Walter U — imavierna, čałaviek z kamandy Surkova — stavić zadačy pa manitorynhu ŚMI Biełarusi, padboru błohieraŭ dla zamoŭnych publikacyj pa techničnych zadańniach.
Jak piša internet-resurs, Buziła dla hetych metaŭ prapanavaŭ Juryja Paŭłaŭca, Siarhieja Šyptenku, Mikałaja Mališeŭskaha, Juryja Barančyka — dvuch pieršych ź ich na minułym tydni zatrymali biełaruskija śpiecsłužby. Taksama ŭ dakumientach uspaminajecca imia Piatra Piatroŭskaha.
Ukrainskija chakiery pryvodziać toje samaje «techničnaje zadańnie» ad rasijskich kurataraŭ.
«Pieramoha prarasiejskich kandydataŭ na vybarach u Małdovie i Bałharyi zadajuć novy trend va ŭschodniejeŭrapiejskaj palitycy, asabliva — na postsavieckaj prastory, — havorycca ŭ zadańni.
— Pra toje, što my majem spravu mienavita z trendam, a nie z vypadkovymi pieramohami ŭmoŭna prarasijskich siłaŭ, možna kazać, kali pryniać da ŭvahi hłabalnyja źmieny (Brekzit, pieramoha Trampa i hetak dalej).
U hetych umovach uchił biełaruskaj ułady ŭvachodzić u supiarečnaść z ahulnaj tendencyjaj: biełarusizacyja, farmavańnie ideałohii dziaržaŭnaha nacyjanalizmu, zajhravańnie z apazicyjaj (dopusk u parłamient prazachodniaj libierałki i nacyjanalistki, dazvoł kancerta pramajdannaha hurtu «Bruta» Siarhieja Michałka i h.d.) vyhladajuć jak adychod ad ahulnych tendencyj, — praciahvajuć aŭtary zadańnia. —
Va ŭmovach hłabalnaha kryzisu ŭłady mnohich krain ŭsio mienš prysłuchoŭvajucca da receptaŭ MVF, usio mienš raźličvajuć na hłabalnyja rynki, imknučysia da raźvićcia ŭnutranaha rynku i rehijanalnaj kaapieracyi. U procivahu hetaj tendencyi ŭłady Biełarusi pašyrajuć supracoŭnictva z MVF, bačačy ŭ hetym svoj pośpiech. Nijakija kredyty ad MVF i Jeŭrasajuza — navat kali jany i buduć — stanovišča nie vyratujuć: zachodnija finansavyja ŭlivańni paciahnuć nie paratunak dziaržsiektara, a paskoranaje jaho skaračeńnie. Palehčyć situacyju mohuć tolki ŭzhodnienyja dziejańni z Rasijaj u ramkach Jeŭrazijskaj ekanamičnaj supolnaści. Ci praciahnuć biełaruskija ŭłady «plavać suprać vietru» abo viernucca da tradycyjnaha «prarasiejskaha» kursu?».
Piotra Piatroŭski, fota Siarhieja Hudzilina
Pavodle «Informnapałma», kankretna hetuju zadaču maskoŭskich palittechnołahaŭ vykanaŭ aŭtar «Imchakłaba» Piotra Piatroŭski — časty hość u pieradačy Vadzima Hihina, prezientuje siabie jak «fiłosaf» i «palitołah».
Tekst Piatroŭskaha, vykanany pavodle zadačy kurataraŭ, apublikavany na sajtach «Imchakłaba» i «Impieryi». Pieršy z sajtaŭ redahuje inšy «fiłosaf i palitołah», Alaksiej Dziermant. Druhi ž — toj samy Barančyk, jaki, jak vynikaje z apublikavanaj u internecie pierapiski, davaŭ zadańni aryštavanym u Biełarusi Alimkinu, Paŭłaŭcu i Šyptenku.
Skrynšot pačatku teksta Piatroŭskaha na «Imchakłabie»
U telefonnaj razmovie z karespandentam radyjo «Svaboda» Piatro Piatroŭski skazaŭ, što publikacyja «Infarmnapałma» — «heta ŭsio paklop. Bolš kankretnuju infarmacyju ja dam u paniadziełak».
Kamientary