Prezident Polščy padpisaŭ zakon ab stvareńni vojskaŭ terytaryjalnaj abarony
Zhodna z zakonam, vojski terytaryjalnaj abarony źjaŭlajucca novym vidam uzbrojenych sił Polščy razam z suchaputnymi vojskami, vajenna-pavietranymi siłami, vajenna-marskim fłotam i siłami śpiecyjalnaha pryznačeńnia, paviedamiła radiopolsha.pl.
Vojski terytaryjalnaj abarony zmohuć razam z suchaputnymi vojskami pravodzić vajennyja dziejańni na sušy, antyterarystyčnyja apieracyi, zmahacca z nastupstvami pryrodnych i technahiennych katastrof. Taksama žaŭniery buduć vieści infarmacyjnuju i aśvietnickuju dziejnaść.
Ciaham niekalkich hadoŭ Ministerstva abarony płanuje stvaryć 17 bryhad TA — pa adnoj u kožnym vajavodstvie i dźvie — u Mazavieckim. Najpierš bryhady buduć stvaracca na ŭschodniaj miažy: u Lublinskim, Padlaskim i Padkarpackim vajavodstvach. Čatyry bataljony stvorać u haradach Lublin, Biełastok, Žešuŭ i Siedlcy.
Čakajecca, što ŭ 2018 hodzie terytaryjalnaja abarona budzie naličvać kala 35 tysiač žaŭnieraŭ, u 2019 hodzie — kala 53 tysiač. Stvareńnie novaha vidu ŭzbrojenych sił abydziecca prykładna ŭ 820 miljonaŭ jeŭra.
Žaŭnieram terytaryjalnaj abarony pry mabilizacyi buduć płacić stolki ž, kolki pryzvanym reziervistam armii. Taksama kožny miesiac cyvilnaha žyćcia jany buduć atrymlivać vypłaty ŭ pamiery ad 500 (šarahoŭcy) i ad 600 (aficery) złotych «za bajavuju hatoŭnaść».
Takim čynam ahulnaja kolkaść słužboŭcaŭ va ŭzbrojenych siłach Polščy pavialičycca ŭ bližejšyja hady prykładna ŭ 1,7 raza.
Ciapier čytajuć
Połk Kalinoŭskaha paviedamiŭ pra hibiel troch bajcoŭ7
Kamientary