Ahienctva «Rehnum» padaje ŭ sud na pradstaŭnicu MZS Rasii Zacharavu praz sprečku pra Biełaruś

U materyjale na sajcie «Riehnum» havorycca, što aŭtary ahienctva nie vykarystoŭvali słovy «niedanarod» i «niedadziaržava» ŭ adnosinach da biełarusaŭ i Biełarusi.

«Słova «niedadziaržava» ŭžyvałasia aŭtaram infarmacyjnaha ahienctva «Riehnum» TOLKI ŭ adnosinach da Ukrainy i tych, chto śviadoma idzie pa jaje šlachu, — da rusafobii, majdanu i dziaržaŭnaha pieravarotu, to bok admaŭleńnia i źniščeńnia ŭłasnaj dziaržaŭnaści,» — pišuć pradstaŭniki rasiejskaha ahienctva.

27 śniežnia na bryfinhu presavaja sakratarka MZS Rasiei Maryja Zacharava adkazała na pytańnie pra aryštavanych u Biełarusi aŭtaraŭ partału «Riehnum» Dźmitryja Alimkina, Juryja Paŭłaŭca i Siarhieja Šyptenku.

Suprać ich u Biełarusi zaviedzienaja kryminalnaja sprava pavodle č. 3 art. 130 KK (raspalvańnie mižnacyjanalnaj varožaści hrupaj asobaŭ), sankcyja jakoj praduhledžvaje pazbaŭleńnie voli na termin ad 5 da 12 hadoŭ.

20 śniežnia na hetuju temu vykazaŭsia rasiejski ambasadar u Miensku Alaksandar Surykaŭ, jaki zajaviŭ:

«Heta biełaruskija hramadzianie, heta biełaruskaja pracesualnaja sprava, heta radykalnyja žurnalisty, ja b tak skazaŭ. Vielmi mocna sumniavajemsia, što ŭsie hetyja vystupy pracujuć na ŭmacavańnie brackich suviaziaŭ pamiž rasiejskim i biełaruskim narodami. A voś mnohaje jość na ŭbivańnie klinoŭ. Vielmi mocna sumniavajemsia, što hetyja ludzi — ščyryja patryjoty krainy, u jakoj jany žyvuć i źjaŭlajucca hramadzianami. Tamu što takija farmuloŭki, jak «niedadziaržava», «niedanarod» nie ŭpryhožvajuć nijakaha hramadzianina, u tym liku i žurnalista krainy. Tamu ŭ hetaj spravie treba vielmi dobra razabracca. Tut jość dysharmonija ŭ pytańniach svabody słova, ale jość i pytańnie radykalizmu, razbureńnia miždziaržaŭnaj i brackaj družby».

Rasiejski žurnalist z partału «Riehnum» zadaŭ Maryi Zacharavaj pytańnie:

«U pačatku śniežnia ŭ Biełarusi byli zatrymanyja try prarasiejskija publicysty, adzin ź jakich naš aŭtar Paŭłaviec, Šaptenka, imia treciaha mnie nieviadomaje. Im staviać u vinu raspalvańnie varožaści, u toj čas jak jany, naadvarot, zaklikali da źbližeńnia z Rasiejaj i pieraścierahali ŭ svaich artykułach biełaruskaje kiraŭnictva ad «zalacańnia» ź biełaruskim nacyjanalizmam i ruchu ŭ bok Zachadu, jak heta adbyłosia na Ŭkrainie. Jany byli aryštavanyja i da hetaha času znachodziacca pad vartaj. Chaciełasia b daviedacca pazycyju MZS z hetaj nahody, pakolki ambasadar Rasiei ŭ Biełarusi Surykaŭ niajasna vykazaŭsia ŭ ich adras, skazaŭšy, što heta biełaruskija hramadzianie i heta sprava Biełarusi. Pa fakcie jany źjaŭlajucca našymi suajčyńnikami, i mnie zdajecca, Rasiei varta było b źviarnuć uvahu na hetuju prablemu.

Adkaz Zacharavaj byŭ nastupny:

«Ja nia zhodnaja, što naš ambasadar u Biełarusi Surykaŭ daŭ niezrazumieły kamentar, jon daŭ jakraz razhornuty kamentar z nahody historyi z zatrymańniem biełaruskich hramadzian Paŭłaŭca, Alimkina i Šaptenki. Jany sapraŭdy supracoŭničali i pracavali z rasiejskimi vydańniami, u pryvatnaści z ahienctvam «Riehnum», tamu ambasadar vykazaŭ naš, rasiejski punkt hledžańnia na hetaje pytańnie. Ja chacieła b skazać, što my padzialajem toje, što było skazana ambasadaram, što ŭžyvańnie takich słoŭ, jak «niedanarod» abo «niedadziaržava» ŭ dačynieńni da Biełarusi i biełarusaŭ — heta niedapuščalna. Vy havorycie pra toje, što jany papiaredžvali Biełaruś ad ruchu ŭ bok Zachadu i «zalacańnia» z nacyjanalizmam. Heta była vaša cytata, i ja nie mahu heta kamentavać. Chaču skazać, što «niedanarod» i «niedadziaržava» z vusnaŭ ludziej, jakija ŭpłyvajuć na hramadzkuju dumku — heta prosta nieprystojnyja rečy, tamu što jany mohuć spryjać raspalvańniu mižnacyjanalnaj prablemy i ksenafobii. Takija vyrazy nie spryjajuć stvareńniu pazytyŭnaj atmasfery ŭ biełaruskich dačynieńniach, choć vy kažacie, što mienavita na heta i była nacelenaja ich praca.

Na ŭdakładnialnaje pytańnie žurnalista, što Paŭłaŭcu, jakija publikavaŭsia ŭ ich, hetyja słovy nie naležać, Zacharava padkreśliła:

«Havorka idzie pra troch žurnalistaŭ, tamu ja chaču skazać, što my dali vielmi vyraznuju acenku tym słovam i vyrazam, jakija jany ŭžyvali, pryčym užyvali, jak ja razumieju, nie ŭ pryvatnych razmovach, a ŭ svaich materyjałach. My paćviardžajem svaju absalutnuju addanaść svabodzie słova i nieabchodnaści abarony pravoŭ žurnalistaŭ i ludziej, jakija pracujuć u jakaści pradstaŭnikoŭ ŚMI. Jak vynikaje z kamentara ambasadara Rasiei ŭ Biełarusi A.A.Surykava, my znachodzimsia z hetaj nahody ŭ pastajannym kantakcie z našymi biełaruskimi kalehami. Jašče raz paŭtaru, my zajaŭlajem pra poŭnuju addanaść i nieabchodnaść abarony jak svabody słova, tak i žurnalistaŭ. Dumaju, što ŭ niezachavańni hetych normaŭ i niaŭvazie da losu žurnalistaŭ nas zapadozryć vielmi składana, tamu i los hetych žurnalistaŭ, jakija supracoŭničali i supracoŭničajuć z rasiejskimi ŚMI, uličvajučy vašy nastojlivyja prośby i zapyty, jakija my atrymlivajem, znachodziacca ŭ sfery našaj pilnaj uvahi».

Adkaz Maryi Zacharavaj na pytańnie pra aryštavanych biełaruskich aŭtaraŭ sajta «Riehnum» źmieščany na sajcie MZS Rasiei.

• 0
• 0
• 0
• 0
• 0
• 0
• 0
• 0