Što rabić, kali vy žyviacie za miažoj, a padatkovaja zapisała vas u «darmajedy»
Pakrokavaja instrukcyja, jak vyzvalicca ad vypłaty zboru na finansavańnie dziaržvydatkaŭ, kali vy bolš za paŭhoda nie žyli ŭ Biełarusi.
Za apošnija dni ŭ razy vyrasła kolkaść listoŭ z patrabavańniem zapłacić zbor na finansavańnie dziaržaŭnych vydatkaŭ. Nakiravali takija listy i tym, chto ŭžo doŭhi čas žyvie za miažoj. Zhodna z dekretam «Ab pieraduchileńni sacyjalnaha ŭtrymanstva», asoby, jakija byli ŭ krainie mienš za 183 dni ŭ kalandarnym hodzie, nie musiać płacić zbor. Kali vy naležycie da hetaj hrupy i atrymali «list ščaścia» — nižejšaj instrukcyja dla vas.
1. U pravym vierchnim kucie na staroncy Ministerstva pa padatkach i zborach vybirajem układku «Elektronny zvarot», i ŭ aknie, jakoje źjaŭlajecca, — «Zvaroty hramadzianaŭ».
2. Traplajem na formu zvarotu, jakuju treba zapoŭnić. U kałoncy «Kamu» vybirajem padatkovuju inśpiekcyju pa adrasie, na jaki vam dasłali paviedamleńnie pra vypłatu zboru. U tekście paviedamleńnia varta paznačyć, što ŭ 2015 hodzie (za jaki zaraz patrabujuć płacić zbor) vy bolš za 183 dni znachodzilisia za miažoj, u čym padatkaviki mohuć upeŭnicca, skarystaŭšysia bazaj pierasiačeńnia miažy. Pracaŭniki padatkovaj majuć mahčymaść pravieryć kolkaść dzion znachodžańnia za miažoj pa kankretnym hramadzianinie, kali jon pradstaviŭ u adpaviednyja orhany infarmacyju pra svaju adsutnaść u krainie.
3. Bolš ničoha rabić nie treba, čakajem adkaz z padatkovaj ab vyzvaleńni ad vypłaty zboru.
Ministerstva padatkaŭ i zboraŭ razhladaje elektronnyja zvaroty za taki samy čas, jak i piśmovyja, — nie bolš za 15 dzion, a ŭ vypadku, kali patrebnyja dadatkovaje vyvučeńnie i pravierka, — nie bolš za miesiac, kali inšy termin nie pryznačajecca zakonami.
Kamientary