SAS admianiŭ dyskvalifikacyju vieślaroŭ, Biełaruś budzie patrabavać pakryćcia škody

Spartyŭny arbitražny sud (CAS) u Łazanie admianiŭ hadavuju dyskvalifikacyju mužčynskaj zbornaj Biełarusi pa viesłavańni na bajdarkach i kanoe, nakładzienuju Mižnarodnaj fiederacyjaj kanoe (ICF) z-za padazreńniaŭ u parušeńni antydopinhavych praviłaŭ, paviedamlaje aficyjny sajt CAS.

Pavialičyć

«Na padstavie dokazaŭ i arhumientaŭ, pradstaŭlenych bakami, Spartyŭny arbitražny sud pryjšoŭ da vysnovy, što nie miełasia dastatkovych dokazaŭ, kab na padstavie mierkavanych parušeńniaŭ antydopinhavych praviłaŭ adchilić mužčynskuju zbornuju Biełarusi pa viesłavańni na bajdarkach i kanoe. Tamu CAS admianiŭ rašeńnie vykankama ICF ab hadavoj dyskvalifikacyi kamandy», — havorycca ŭ pres-relizie.

Takim čynam, CAS zadavoliŭ apielacyju biełarusaŭ na rašeńnie Mižnarodnaj fiederacyi kanoe ab dyskvalifikacyi mužčynskaj kamandy. Inicyjataram i kaardynataram padačy pazovu staŭ Nacyjanalny alimpijski kamitet Biełarusi.

Biełaruś budzie patrabavać kampiensacyi ŭronu za adchileńnie zbornaj. Pra heta zajaviŭ hienieralny sakratar Nacyjanalnaha alimpijskaha kamiteta Biełarusi Anatol Kotaŭ.

— Apraŭdanyja całkam usia mužčynskaja kamanda, trenierski skład, daktary i aficyjnyja asoby. U nas jość płan dalejšych dziejańniaŭ. My budziem rychtavać pazoŭ u sud u Šviejcaryi ab kampiensacyi maralnaj škody, jaki paniesła naša kamanda ŭ suviazi ź niadopuskam na Alimpijskija hulni i biespadstaŭnym źniaćciem faktyčna na paŭhoda ad trenirovačnaha pracesu i mižnarodnych startaŭ, — zajaviŭ Kotaŭ u efiry telekanała «Biełaruś1».

Taksama biełaruski bok maje namier padać pazoŭ ab kampiensacyi vydatkaŭ na padrychtoŭku kamandy da Alimpijady za čatyry hady.

21 studzienia Nacyjanalny alimpijski kamitet Biełarusi atrymaŭ aficyjnaje paviedamleńnie ad francuzskaha antydopinhavaha ahienctva, u jakim pakazvałasia, što pretenzij da čatyroch ź piaci biełaruskich vieślaroŭ, jakija padazravalisia ŭ parušeńni antydopinhavych praviłaŭ pa vynikach zboraŭ u Francyi ŭ krasaviku 2016 hoda, niama. Heta Andrej i Alaksandr Bahdanovičy, Alaksandr Lapieška, Dźmitryj Silčanka. U Maksima Piatrova miełasia niaznačnaje pieravyšeńnie dapuščalnaj kancentracyi mialdonija ŭ probie.

NAK adrazu ž padrychtavaŭ zajavu ŭ Spartyŭny arbitražny sud u Łazanie z paviedamleńniem ab dadzienym fakcie, kab rašeńnie francuzskaha ahienctva było dałučanaje da spravy i prymałasia pad uvahu pry vyniasieńni rašeńnia.

Imavierna, hety krok paskoryŭ rašeńnie CAS, vierdykt jakoha čakaŭsia tolki ŭ kancy hetaha tydnia, bo 6 studzienia Spartyŭny arbitražny sud (CAS) čarhovy raz pieranios abviaščeńnie vierdyktu pa spravie biełaruskich bajdaračnikaŭ i kanaistaŭ. Novaj dataj abviaščeńnia rašeńnia było nazvana 27 studzienia.

Z-za adchileńnia biełaruskich vieślaroŭ paśla skandalnaha pieratrusu padčas trenirovačnaha zboru ŭ Francyi ŭ krasaviku 2016 ha mužčynskaja zbornaja Biełarusi vymušanaja była prapuścić Alimpijadu ŭ Rya-de-Žaniejra. Naša zbornaja, na dumku śpiecyjalistaŭ, niedaličyłasia z-za hetaha ŭ Rya 2-4 miedaloŭ.

• 0
• 0
• 0
• 0
• 0
• 0
• 0
• 0