U vyniku bajavych dziejańniaŭ u Danieckaj vobłaści Ukrainy pierapyniena zabieśpiačeńnie elektraenierhijaj, vadoj i ciapłom horada Aŭdziejeŭka, padkantrolnaha ŭkrainskim uładam.
«Horad zastaŭsia biez vady, biez elektryčnaści i bieź ciepłazabieśpiačeńnia», — zajaviŭ viečaram 30 studzienia kiraŭnik abłasnoj administracyi Pavieł Žebroŭski.
Pa słovach Žebroŭskaha, u vyniku abstrełaŭ z boku sieparatystaŭ była «pierabita apošniaja linija elektrapieradačy na Aŭdziejeŭku» i abiastočana Danieckaja filtravalnaja stancyja i Aŭdziejeŭski koksachimičny zavod, što zabiaśpiečvajuć horad vadoj i ciapłom.
Infarmacyjnyja sajty prychilnikaŭ samaabvieščanaj Danieckaj narodnaj respubliki abvinavačvajuć ukrainskich vajskoŭcaŭ u abstrełach, jakija spynili pracu filtravalnaj stancyi.
Pavodle zajavy kampanii «Vada Danbasa», Danieckaja filtravalnaja stancyja taksama zabiaśpiečvaje Danieck i Jasinavatuju (padkantrolnyja sieparatystam), adnak padaču vady ŭ hetyja nasielenyja punkty ŭdałosia kampiensavać ź inšych krynic.
Pres-słužba prezidenta Ukrainy Piatra Parašenki ŭviečary 30 studzienia paviedamiła, što jon pierapyniŭ svoj vizit u Hiermaniju z-za «nadzvyčajnaj situacyi [u Aŭdziejeŭcy], jakaja miažuje z humanitarnaj katastrofaj».
Jak paviedamiła 112.ua, sa spasyłkaj na pres-aficera 72-j bryhady, kala 6-j ranicy aŭtorka sieparatysty vypuścili pa Aŭdziejeŭcy čatyry pakiety «Hrada».
«Horad haryć. Jość achviary siarod mirnaha nasielnictva», — skazała pres-aficer.
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary