Biełaruski dałučylisia da suśvietnaha fłešmobu suprać hvałtu VIDEA
Štohod u Dzień usich zakachanych miljony ludziej, nieabyjakavych da prablemy hiendarnaha hvałtu, udzielničajuć u tancavalnym fłešmobie, jaki atrymaŭ nazvu «ONE BILLION RISING», ci «Adzin miljard paŭstałych».
Biełaruski ŭžo druhi raz ładziać takuju akcyju.
Čamu mienavita taniec? «Taniec niebiaśpiečny i prynosić radaść, seksualny i śviaty, jon razburaje i zaradžaje, jon parušaje praviły. Jon moža adbycca dzie zaŭhodna i kali zaŭhodna, ź luboj i kožnaj, całkam biaspłatna. Taniec patrabuje ad nas zajmać prastoru, my zajmajem jaje razam, u supolnaści. Taniec abjadnoŭvaje nas i prymušaje ruchacca dalej, voś čamu jon u centry akcyi «ONE BILLION RISING», — tłumačyć arhanizatarka ruchu Iŭ Encler.
Arhanizatarami fłešmobu sioleta vystupili aktyvisty sacyjalna-spartyŭnaha prajekta «Zdolnaja». Dziakujučy ich inicyjatyvie, u studyi tancaŭ i fitnesu «ZAMES STUDIO» sabralisia žančyny roznaha ŭzrostu, kab stančyć pad pieśniu «Brake the Chain» i takim čynam vykazać svajo «nie» lubym formam hvałtu.
«Chtości zapytajecca: jakim čynam fłešmob moža dapamahčy prablemie? Ad hetaha ž ni horača, ni chałodna tym, chto ad jaje pakutuje. Ale ja chaču skazać, što dla mianie heta publičny žest u padtrymku ludziej, jakija trapili ŭ składanyja žyćciovyja abstaviny. Jany pavinny viedać, što vychad jość, što jość roznyja arhanizacyi, jakija dapamohuć. Naprykład, «Radzisłava», dzie možna znajści schovišča. Ale hałoŭnaje — razumieć, što ty možaš niešta źmianiać, šukać i znachodzić padtrymku», — raspaviała pra asnoŭnyja zadačy fłešmobu arhanizatarka prajekta «Zdolnaja» Hanna Bandarenka.
«Simvalična, što fłešmob prachodzić u Dzień śviatoha Valancina: kachańnie — heta kruta, ale jašče bolš važna, kab adnosiny byli zdarovymi i partniory pavažali adno adnaho. A taniec — heta dobraja forma pryciahnieńnia hramadskaj uvahi», — dadała Palina Łachmanienka, adna z udzielnic.
Kožnaja treciaja žančyna ŭ śviecie pakutuje ad hvałtu ŭ siamji. Biełaruś — nie vyklučeńnie. Pa aficyjnych dadzienych Ministerstva ŭnutranych spraŭ, zabojstvy i naŭmysnaje pryčynieńnie ciažkich cialesnych paškodžańniaŭ blizkim składajuć piatuju častku ŭsich złačynstvaŭ.
Letaś u Biełarusi było ździejśniena 2539 złačynstvaŭ u śfiery siamiejnych adnosin, ale mnohija žančyny, na žal, zamoŭčvajuć asabistyja prablemy i nie źviartajucca ŭ pravaachoŭnyja orhany.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam1
Kamientary