ZŠA pieradali Łukašenku najnoŭšyja amierykanskija leki dla pachudzieńnia

Na viačery z pasłańnikam Trampa Alaksandr Łukašenka niečakana źviarnuŭsia da jaho z asabistym pytańniem: «Vy schudnieli?»

«Tak», — adkazaŭ Džon Koŭł, spraktykavany advakat, jaki reprezientavaŭ intaresy Donalda Trampa ŭ sudach suprać Meta i inšych sacyjalnych sietak. Koŭł raskazaŭ, jak skinuŭ vahu, vykarystoŭvajučy Zepbound — injekcyi, efiektyŭnyja pry baraćbie z atłuścieńniem.

Heta byŭ davierny momant, choć sama dypłamatyčnaja inicyjatyva była dziŭnavataja, piša vydańnie. Łukašenka chacieŭ, kab Vašynhton źmiakčyŭ šerah sankcyj suprać niekatorych z samych prybytkovych kampanij jaho krainy — i kab jon moh adramantavać svoj prezidencki «Boinh».

«Uzamien dyktatar byŭ hatovy handlavać adzinym resursam, jakoha ŭ jaho šmat: palitviaźniami. Kali b Koŭł damohsia pośpiechu, heta mahło b stać testavym prahonam dla hałoŭnaj mety administracyi Trampa — vyviadzieńnia Pucina i rasijskaj ekanomiki pamieram 2 tryljony dołaraŭ ź izalacyi.

I, mahčyma, padumali amierykanskija čynoŭniki, jość sposab dapamahčy hruznamu 71‑hadovamu kiraŭniku dziaržavy, zacikaŭlenamu ŭ tym, kab skinuć vahu. Jany vyrašyli vyvučyć mahčymaść arhanizacyi pastavak Zepbound dla asabistych patreb Łukašenki», — piša The Wall Street Journal.

Havorka pra hety preparat zachodziła nie pieršy raz. Łukašenka cikaviŭsia lekami dla pachudzieńnia jašče padčas krasavickaha vizitu Koŭła, a blizki pamočnik nastojliva raiŭ Łukašenku niešta zrabić sa svajoj vahoj, paviedamiła krynica, znajomaja ź situacyjaj.

Pavialičyć

Pacla piaci hadoŭ izalacyi Łukašenki cjapier Koŭł rehularna razmaŭlaje z Rybakovym, pasłom Biełarusi pry AAN. Jany abmiarkoŭvali źniaćcio sankcyj i toje, jak buduć arhanizavanyja pastaŭki zapčastak dla samalotaŭ. Amierykanskija čynoŭniki pracavali nad jurydyčnymi farmuloŭkami, kab źnizić ryzyku taho, što kampanienty Boeing buduć tajemna pierapraŭlenyja ź Biełarusi ŭ Rasiju.

U svaju čarhu, Łukašenka dzialiŭsia z amierykancami svaim razumieńniem Pucina i paspryjaŭ praviadzieńniu samitu ZŠA i Rasii na Alascy minułym letam.

Łukašenka taksama havaryŭ z amierykancami pra Nikałasa Maduru, vieniesuelskaha dyktatara, jaki ciapier zabłakavany amierykanskim fłotam. Jon taksama havaryŭ pra svajho inšaha sajuźnika Si Czińpina, jaki abiedaŭ z Kolem, kali toj vučyŭsia ŭ Piekinie.

«Hetyja kantakty vyklikali supiarečlivuju reakcyju siarod jeŭrapiejskich sajuźnikaŭ i biełaruskich dysidentaŭ: jany rady bačyć, jak viaźni vychodziać z turmaŭ, ale nie viedajuć, jak stavicca da taho, što najbolšaha ŭ śviecie śpiecyjalista pa zachopie zakładnikaŭ dorać uvahaj i robiać jamu ekanamičnyja pasłableńni.

«Heta davoli źmiašanyja pačućci. Ja adčuvaju radaść, radaść za biełaruskich ludziej», — skazała vydańniu Śviatłana Cichanoŭskaja. The Wall Street Journal nazyvaje jaje «pryznanaj mižnarodnaj supolnaściu pieramožcaj vybaraŭ 2020 hoda, čyj muž byŭ siarod tych, kaho vyzvalili sioleta».

«Ale, kaniečnie, dla Łukašenki vyzvaleńnie ludziej maje svaju canu, i jon hatovy pradavać ludziej, pakul heta mahčyma. Heta moža vyhladać jak kruhavyja dźviery, jakija kruciacca i kruciacca», — cytuje jaje vydańnie. Majecca na ŭvazie: Łukašenka vypuskaje adnych, a tym časam źniavolvaje inšych.

Pavialičyć

«Łukašenka źniavoliŭ bolš za 30 000 pratestoŭcaŭ paśla taho, jak iłžyva zajaviŭ pra svaju pieramohu ŭ 2020 hodzie. Dysidentaŭ katavali i trymali ŭ poŭnaj izalacyi, vykarystoŭvali zhvałtavańni i seksualny hvałt dla padaŭleńnia niazhody, havorycca ŭ spravazdačy Rady AAN pa pravach čałavieka. Praz hod jaho dyśpietčary prymusili samalot Ryanair, jaki lacieŭ nad Biełaruśsiu, sieści ŭ Minsku — śćviardžajučy, što na borcie bomba — što dazvoliła palicyi schapić biełaruskaha apazicyjnaha žurnalista, jaki byŭ na borcie.

Paźniej pamiežniki hnali tysiačy mihrantaŭ u susiednija Polšču i Litvu, adciahvajučy ŭvahu jeŭrapiejskich palitykaŭ ad maštabnaha naroščvańnia vojskaŭ Pucina, u tym liku dziasiatkaŭ tysiač na miažy Biełarusi z Ukrainaj. Na minułym tydni Łukašenka abviaściŭ, što novaja rasijskaja jadziernaja rakieta «Arešnik» razhornuta na biełaruskaj terytoryi i ciapier znachodzicca «na bajavym dziažurstvie». Jon nazyvaje Paŭnočnuju Kareju madellu dla Biełarusi, chvalić jaje jadzierny patencyjał i paŭtaraje jaje vajaŭničuju rytoryku», — piša vydańnie.

Pavialičyć

U artykule pryvodzicca jašče niekalki cikavych faktaŭ.

Hlebu dla zbližeńnia krainy z Amierykaj rychtavaŭ sam Łukašenka. Adrazu paśla druhoj inaŭhuracyi Trampa Ministerstva zamiežnych spraŭ Biełarusi źviazałasia ź Dziarždepam praz kanał, jaki zvyčajna vykarystoŭvajecca dla praduchileńnia vajennych kanfliktaŭ, kab paviedamić, što Biełaruś spadziajecca na «adlihu» ŭ dvuchbakovych adnosinach. Vašynhton u adkaz prapanavaŭ, kab Biełaruś sama zrabiła pieršy krok.

Inšy momant — ź pieramovaŭ u Minsku. Za harełkaj Koŭł paraŭnaŭ mižnarodnyja adnosiny sa školnaj stałoŭkaj i skazaŭ Łukašenku, što toj siadzić za «stałom dla niaŭdačnikaŭ» suśvietnaj palityki razam ź Vieniesuełaj, Iranam i Paŭnočnaj Karejaj, ale moža pierasieści za «stoł dla krutych chłopcaŭ» z dapamohaj ZŠA. «Dyktatar prapanoŭvaŭ šmat tostaŭ z harełkaj ułasnaha brenda «Prezident», — pišacca ŭ artykule. Ale Koŭł vylivaŭ źmieściva čarak, pakul Łukašenka advaročvaŭsia.

Pavialičyć

U źniaćci sankcyj z kaliju, pra što vielmi prasiŭ Łukašenka, Koŭł i amierykanskaja kamanda bačyli vyhadu dla amierykanskich fiermieraŭ, piša vydańnie.

The Wall Street Journal adznačaje, što i Alaksandr Łukašenka padčas pieramovaŭ vykarystaŭ dadatkovuju prymanku: jon prapanavaŭ, kab Biełaruś kupiła bolš samalotaŭ Boeing.

Adnak na UNS na minułym tydni Łukašenka skazaŭ, što Biełarusi ŭsio ž taki samaloty Boeing nie patrebnyja: «My damovilisia z Pucinym, što budziem kuplać rasijskija samaloty».

• 1
• 0
• 11
• 20
• 1
• 0
• 3
• 0