Pytańnie terytoryj — samaje składanaje pytańnie mirnaha płana z 20 punktaŭ, jaki abmierkavali Ukraina i ZŠA.
Pytańnie terytoryj — samaje składanaje pytańnie mirnaha płana z 20 punktaŭ, jak adznačyŭ siońnia ŭ razmovie z žurnalistami Uładzimir Zialenski, paviedamlaje RBK-Ukraina.
U prajekcie dakumienta paznačana, što ŭ Danieckaj, Łuhanskaj, Zaparožskaj i Chiersonskaj abłaściach linija sutyknieńnia fiksujecca pa miescy raźmiaščeńnia vojskaŭ na datu padpisańnia damovy. Heta značyć — «stajać tam, dzie staim».
Z Dnieprapiatroŭskaj, Mikałajeŭskaj, Sumskaj i Charkaŭskaj abłaściej RF pavinna vyvieści vojski, kab damova nabyła moc, patrabuje Ukraina. Ale RF choča, kab Ukraina vyjšła z Danieckaj vobłaści; kampramisny varyjant ad ZŠA — svabodnaja ekanamičnaja zona.
«My ličym, što volnaja ekanamičnaja zona — heta patencyjnaja mahčymaść suvierennaj dziaržavy vybirać taki šlach. My zmahalisia za adno słova — «patencyjnyja». My ličym, što takaja patencyjnaść, jak ekanamičnyja zony, moža być u dziaržavy», — adznačyŭ Zialenski.
Jon rastłumačyŭ, što kali nie ŭdasca damovicca pra «stajać tam, dzie staim», jość dva varyjanty: praciah vajny abo nieabchodna budzie vyrašać usie pytańni z patencyjnymi ekanamičnymi zonami.
U vypadku, kali razmova ŭsio ž budzie pra patencyjnuju svabodnuju ekanamičnuju zonu Danbasu — heta treba budzie vyrašać na refierendumie.
«To-bok, kali pra heta idzie razmova, to viadziecca pra niejki asablivy farmat, a značyć asablivaje rašeńnie, a značyć, heta refierendum — tolki refierendum moža vyznačyć, ci zhodnyja ludzi na taki šlach, kali prapanova dla Ukrainy mienavita takaja — albo heta, albo vajna», — dadaŭ jon.
Pry hetym Zialenski adznačyŭ, što ZŠA chočuć refierendum, i jon im tłumačyŭ, što na taki refierendum pryjdziecca stavić uvieś dakumient, a nie asobnyja pytańni.
«My možam pajści na refierendum poŭnaj damovaj, jakaja zamacavała b zakančeńnie vajny. Na refierendum treba minimum 60 dzion. I nam patrebna realnaje spynieńnie ahniu na 60 dzion. Inakš my nie praviadziem. To-bok refierendum nie budzie lehitymnym», — dadaŭ jon.
Jon taksama rastłumačyŭ, što kali ŭsio ž budzie svabodnaja ekanamičnaja zona, mižnarodnyja siły buduć jaje manitoryć, a stvareńnie takoj zony taksama pavinna być zaćvierdžana Radaj. Tamu akramia refierendumu patrebny budzie i asobny zakon.
Kamientary