U Bavaryi pradstavili zakonaprajekt, jaki praduhledžvaje ŭviadzieńnie zabarony na musulmanskaje adzieńnie, jakaja całkam zakryvaje tvar — parandžu i nikab. Zabarona budzie dziejničać u škołach i univiersitetach. Taksama nielha budzie źjaŭlacca ŭ takim vyhladzie na pracoŭnym miescy i kiravać mašynaj, paviedamlaje VVS.
«Kamunikacyja zaklučajecca nie tolki ŭ słovach, ale i ŭklučaje źniešni vyhlad, vyraz tvaru, žesty», - zajaviŭ ministr unutranych spraŭ ziamli Jaachim Hierman.
Jon adznačyŭ, što zvyčaj chavać tvar supiarečyć kultury znosin, jakaja isnuje ŭ Hiermanii. Sa słoŭ ministra, kamunikacyja źjaŭlajecca adnoj z umoŭ isnavańnia demakratyčnaha hramadstva.
Praciŭniki hetaj zabarony kažuć, što jana budzie mieć mała praktyčnaha značeńnia, bo ŭ Bavaryi pražyvaje nie vielmi šmatlikaja supołka musulman. Na dumku praciŭnikaŭ zabarony, hetaja miera źjaŭlajecca papulisckaj i prymajecca z-za nadychodziačych fiederalnych parłamienckich vybaraŭ, zapłanavanych na vierasień hetaha hoda.
Na dumku krytykaŭ zakonaprajekta, kirujučaja kaalicyja idzie na papulisckija kroki z tym, kab strymać rost papularnaści jeŭraskieptykaŭ i praciŭnikaŭ pryjomu mihrantaŭ i biežancaŭ z partyi «Alternatyva dla Hiermanii».
Absalutnaja bolšaść deputackich miescaŭ u miascovym parłamiencie naležyć Chryścijanska-sacyjalnamu sajuzu. Jak adznačajuć kamientatary, zakonaprajekt moža być pryniaty da pačatku letnich kanikuł.
U śniežni minułaha hoda kancler Hiermanii Anhieła Mierkiel upieršyniu vykazałasia ŭ karyść zabarony na našeńnie ŭ krainie parandžy i nikaba. Raniej MUS fiederalnaj ziamli Hiesen zabaraniła dziaržaŭnym słužačym prychodzić na pracu ŭ parandžy.
Kamientary