Minski aŭtazavod zapuścić u hetym hodzie vytvorčaść hruzavikoŭ ekałahičnaha kłasa Jeŭra-6 dla jeŭrapiejskaha rynku, paviedamili BIEŁTA ŭ kampanii.
U krainy ES pajeduć novyja samazvały, šasi i siedłavyja ciahačy z roznymi kołavymi formułami (4ch2, 6ch4 i 8ch4) i ruchavikami Mercedes-Benz.
Hruzaviki vypuščanyja ŭ dvuch kłasach — biudžetnym i luksavym. U pryvatnaści, dla jeŭrapiejskaha rynku vyrablenyja piać bazavych madelaŭ mahutnaściu ad 300 konskich sił. Paśla praviadzieńnia nieabchodnych vyprabavańniaŭ i padrychtoŭčych pracesaŭ aŭtamabili pastupiać u sieryjnuju vytvorčaść.
Z novymi hruzavikami AAT «MAZ» zmoža pašyryć svaju prysutnaść u krainach Bałtyi, Bałkanskaha paŭvostrava i Zachodniaj Jeŭropy. «Našy hruzaviki kłasa Jeŭra-6 kankurentazdolnyja ŭ Jeŭrasajuzie jak pa charaktarystykach, tak i pa canie. My, viadoma, realna aceńvajem svaje pierśpiektyvy i ŭzrovień kankurencyi, adnak nam sapraŭdy jość što prapanavać jeŭrapiejskim spažyŭcam», — adznačyŭ namieśnik hałoŭnaha kanstruktara Mikałaj Łakotka.
Novyja hruzaviki taksama płanujuć pastaŭlać rasijskim pieravozčykam, jakija vykonvajuć rejsy ŭ jeŭrapiejskija krainy.
«Na rasijski rynak pradpryjemstva pastavić siedłavyja ciahačy kłasa Jeŭra-6 raniej za miascovych aŭtavytvorcaŭ i adnačasova ź vialikaj jeŭrapiejskaj siamiorkaj, — padkreśliŭ Mikałaj Łakotka. — Niahledziačy na toje, što ŭ dadzieny momant u techničnym rehłamiencie Mytnaha sajuza jašče nie vyznačanyja patrabavańni da aŭtamabilaŭ kłasa Jeŭra-6, Minski aŭtazavod zasiarodziŭ svaje siły na raspracoŭcy i vyrabie aŭtamabilaŭ, jakija adpaviadajuć samym žorstkim i sučasnym patrabavańniam pravił i dyrektyŭ jeŭrapiejskich standartaŭ».
Ciapier čytajuć
U jakim miesiacy biełarusy pamirajuć čaściej za ŭsio?1
Kamientary