Biełaruskaje zakanadaŭstva ŭrešcie budzie biełaruskamoŭnym? Šukajucca vałanciory dla pierakładu
U pieršuju viesnavuju subotu na placoŭcy Tavarystva biełaruskaj movy imia Franciška Skaryny sabralisia nieabyjakavyja ludzi, kab pierakładać jurydyčnyja dakumienty, što isnujuć tolki pa-rusku, na biełaruskuju movu.
«Adsutnaść zakanadaŭstva na biełaruskaj movie mocna strymlivaje pašyreńnie dziełavych znosinaŭ na rodnaj movie. Vieści spravavodstva, afarmlać dakumienty pa-biełarusku biez aficyjnaha zakanadaŭstva — niaŭdziačnaja sprava», — adznačaje inicyjatarka prajekta Vieranika Mazurkievič.
Vałanciory pracujuć praź biaspłatnuju vobłačnuju płatformu «SmartCAT», jakaja dazvalaje ŭ zručny dla karystalnika čas pierakładać teksty na padstavie ahulnaha hłasaryju, kab nie było razychodžańnia ŭ terminałohii.
Aktyvisty pačali z Hramadzianskaha i Pracoŭnaha kodeksaŭ. U płanach — skončyć pierakład dadzienych pravavych aktaŭ da kanca krasavika, a paśla dabicca ich pryniaćcia jak paŭnavartasnych dakumientaŭ na biełaruskaj movie.
Dapamahać vałancioram u hetym prajekcie ŭzialisia i prafiesijnyja pierakładčyki.
Vital Stanišeŭski, kiraŭnik ahienctva pierakładaŭ LINGVA-BY: «Miarkuju, što takoj surjoznaj spravy, jak pierakład zakanadaŭstva, patrabujecca prafiesijny i mietadyčny padychod. Tamu ja dałučyŭsia da inicyjatyvy, kab paspryjać svaim dośviedam i napracoŭkami».
Taksama dapamahaje aktyvistam pierakładnickaja supołka «Reziervacyja», jakaja adznačyłasia pierakładam anłajn-hulniaŭ «Śviet tankaŭ» i «Lehiendy Ajzenvalda».
Siońnia byŭ pieršy etap supolnych pierakładaŭ. Płanujecca jašče niekalki padobnych sustrečaŭ. Nastupnaja — praz tydzień, 11 sakavika.
«Naša Niva» taksama vyrašyła dałučycca da hodnaj inicyjatyvy i zaprašaje paŭdzielničać usich nieabyjakavych. Nie varta bajacca, kali niama ŭpeŭnienaści ŭ hłybini moŭnych viedaŭ: usio budzie pierapravierana i vyčytana prafiesijnymi karektarami. Hałoŭnaje — sinierhija jednaści i viera ŭ pieramieny. Bo prykra, što biełarusy musiać žyć pa zakonach, jakija nichto navat nie pastaraŭsia napisać dla ich na rodnaj movie.
Dapamahać možna jak na vočnych sustrečach, tak i dystancyjna, siedziačy doma va ŭtulnaj fateli, praź internet-płatformu.
Dadatkovuju infarmacyju možna znajści ŭ supołcy prajekta ŭ Facebook abo źviarnucca na adras: [email protected]
Kamientary