Rasijski žurnalist: «Skažycie mnie, što CRU nie vodzić rukoj Michałka»
Upłyvovy žurnalist rasijskaha kanała «Rasija-24» i kinaprapahandyst Kanstancin Siomin pastaviŭ u adzin šerah z kultavymi kalektyvami savieckaha i rasijskaha roku 1980-ch hurt «Bruta», pryčym nazvaŭ jaho bolš cikavym, talenavitym i niebiaśpiečnym.
Žurnalist, jaki maje ŭłasnuju pieradaču na rasijskim telebačańni, nazyvaje savieckuju rok-muzyku časoŭ Pierabudovy «saŭndtrekam da razvału dziaržavy», jakaja dapamahła adarvać moładź ad kamunistyčnych idej.
Źjaŭleńnie i rańniuju tvorčaść hurtoŭ «DDT», «Kino», «Akvaryum» i inšych jon naŭprost źviazvaje z padryŭnoj dziejnaściu i ŭpłyvam amierykanskich śpiecsłužbaŭ.
Siomin nie chavaje svaich leninisckich i stalinisckich pohladaŭ i adznačaje ŭ svaim videabłohu, što ŭ jahonych rasijskich adnadumcaŭ «Niama čaho słuchać… Ničoha novaha na našym muzyčnym łandšafcie nie prabiłasia».
A ź inšaha boku, kaža žurnalist, jość šerah nacyjanalistyčnych kalektyvaŭ, pa-sapraŭdnamu talenavitych i cikavych. U jakaści adzinaha prykładu jon pryvioŭ biełaruski «Bruta».
«Ja voś ciapier ź Minska prylacieŭ, pahladzieŭ, tam 8 sakavika budzie kancert hrupy «Bruta». Pahladzicie klipy, teksty, pasłuchajcie pieśni - i skažycie mnie, što CRU nie piša Michałku, nie vodzić jahonaj rukoj, nie dapamahaje jamu pierabirać struny», - skazaŭ Siomin na videa, jakoje źjaviłasia 5 sakavika.
«Ale ja źviarnuŭ uvahu, što klipy dla «Bruta» zdymajuć užo niekatoryja chłopcy, jakija rabili takija ž nacyjanalistyčnyja žorstkija klipy ŭ našaj krainie. Heta ŭžo inšaja kultura, heta ŭžo nie zusim rok, heta rep-kor, chip-chop», — dadaŭ jon.
36-hadovy Siomin maje rasijski miedal ordena «Za zasłuhi pierad Ajčynaj» 2-j stupieni, pracavaŭ u Čačni, Iraku, ZŠA. Viadzie prahramu «Ahitacyja i prapahanda» na «Rasii-24», staŭ viadomym, kali nazvaŭ u efiry prahramy «Vieści» zabojstva sierbskaha premjera Zorana Džyndžyča zasłužanym, što vyklikała mižnarodny skandał.
U 2014 hodzie stvaryŭ film «Bijachimija zdradnictva», skiravany suprać rasijskaj apazicyi Pucinu.
Kamientary