Biełaruś vyłučyła kandydatam na pasadu hienieralnaha sakratara ABSIE pastajannaha pradstaŭnika našaj krainy pry ABSIE, pasła Biełarusi ŭ Aŭstryi Alenu Kupčynu, paviedamlaje pres-słužba MZS.
«Hetaje rašeńnie pradyktavanaje ščyrym imknieńniem Biełarusi ŭnieści ŭkład va ŭmacavańnie ABSIE ŭ intaresach usich dziaržaŭ-udzielnic. U situacyi vostrych rehijanalnych kanfliktaŭ, rostu supiarečnaściaŭ pamiž suśvietnymi hulcami, rola Arhanizacyi pa biaśpiecy i supracoŭnictvie ŭ Jeŭropie znoŭ vielmi važnaja», — zajaviŭ pres-sakratar MZS Dźmitryj Mirončyk.
Jon adznačyŭ, što Kupčyna, jakaja doŭhi čas zajmała pasadu namieśnika ministra zamiežnych spraŭ Biełarusi, brała niepasredny ŭdzieł u realizacyi źniešniepalityčnaj linii krainy, nakiravanaj na ŭmacavańnie biaśpieki i stabilnaści ŭ Jeŭropie, naładžvańnie dyjałohu pamiž Uschodam i Zachadam, urehulavańnie vostrych kryzisnych situacyj u rehijonie.
«Ličym, što jaje viedy, šmathadovy dypłamatyčny dośvied i šyrokija mižnarodnyja kantakty buduć karysnyja dla pavyšeńnia efiektyŭnaści ABSIE, rašeńnia niaprostych zadač, jakija stajać pierad arhanizacyjaj, u tym liku najbolš važnaj i składanaj — pieraadoleńnie kryzisu davieru pamiž dziaržavami-ŭdzielnicami», — zajavili ŭ viedamstvie.
Paŭnamoctvy dziejnaha hienieralnaha sakratara ABSIE italjanca Łambierta Dzańjera zakančvajucca 30 červienia hetaha hoda. Pracedura abrańnia novaha hienieralnaha sakratara tolki pačałasia: 14 sakavika ŭ Vienie prajšli pieršyja słuchańni, u chodzie jakich pretendenty pradstavili pastajannym pradstaŭnikam dziaržaŭ-udzielnic svaje pryjarytety.
Kamientary