Śpiecdakładčyk AAN pa Biełarusi zaklikaje Łukašenku spynić hvałt i represii
Specyjalny dakładčyk ab sytuacyi z pravami čałavieka ŭ Biełarusi Mikłaš Charaści vykazaŭ tryvohu ŭ suviazi z adkrytym uznaŭleńniem biełaruskimi ŭładami palityki represijaŭ u dačynieńni da mirnych demanstrantaŭ, niaŭradavych arhanizacyjaŭ, žurnalistaŭ i palityčnych praciŭnikaŭ.
Jak paviedamlaje sajt AAN, spadar Charaści zaklikaŭ aficyjny Miensk spynić hvałt i pieraśled apanentaŭ.
«Padziei apošnich vychodnych dakazvajuć naŭmysny charaktar represiŭnych zachadaŭ, a taksama pakazvajuć adkrytaje viartańnie ŭłady da byłoj palityki masavych represijaŭ suprać hramadzianaŭ, jakija ažyćciaŭlajuć abo prasoŭvajuć abaronu pravoŭ čałavieka, praduhledžanuju Kanstytucyjaj i mižnarodnymi damovami», — padkreśliŭ dakładčyk.
25-26 sakavika vykarystanyja žorstkija zachady suprać dziasiatkaŭ pravaabaroncaŭ — miascovych i mižnarodnych. Sotni mirnych demanstrantaŭ, jakija pratestavali suprać sacyjalnaj palityki ŭradu, byli atakavanyja, advolna aryštavanyja i pazbaŭlenyja voli, a potym u paskoranym paradku aštrafavanyja abo asudžanyja da turemnaha źniavoleńnia. Na miescy asnoŭnych padziejaŭ byŭ adklučany internet, ź pierabojami pracavała mabilnaja suviaź.
Ad siaredziny lutaha demanstranty pratestujuć suprać dekretu, pavodle jakoha ŭ dačynieńni da asobaŭ, što nie pracujuć bolš za 183 dni i aficyjna nie zarehistravanyja jak biespracoŭnyja, moža być užyty štraf.
Spadar Charaści asabliva zasmučany napadami na ofisy NDA, u tym liku ofis pravaabarončaha centru «Viasna», što supravadžalisia fizyčnym hvałtam, a taksama źniknieńniem na try dni palityčnaha apanenta ŭładaŭ Mikoły Statkieviča, jaki ŭ paniadziełak narešcie vyzvaleny ź SIZA KDB.
«Dva tydni tamu ja, razam ź inšymi ekspertami ŭ halinie pravoŭ čałavieka, papiaredžvaŭ: urad Łukašenki, viadomy historyjaj hvałtoŭnaha pieraśledu luboj formy krytyki, moža pajści na dalejšyja parušeńni».
Mikłaš Charaści vykazvaje škadavańnie, što jahonyja pieraściarohi spraŭdzilisia.
Jon zapeŭniŭ, što budzie praciahvać pilna sačyć za sytuacyjaj i zaklikać mižnarodnuju supolnaść damahacca pačatku dyjalohu z pravaabaroncami, z tymi, chto sadziejničaje mirnym i demakratyčnym źmienam u Biełarusi.
Biełaruskija ŭłady nie puskajuć spadara Charaści ŭ krainu.
Kamientary