U hetym siezonie kiraŭnik BATE Anatol Kapski nie prysutničaŭ ni na adnym matčy kamandy. A na hulni barysaŭskaha kłuba suprać minskaha «Dynama» 20 maja zaŭziatary BATE vyviesili banier u jaho padtrymku: «Anatolič! S vami tysiači sierdiec!». Što ž zdaryłasia?
Vyśvietliłasia, što ŭ viadomaha futbolnaha funkcyjaniera znoŭ pačalisia prablemy sa zdaroŭjem. Pa infarmacyi «Našaj Nivy», Kapski prastyŭ jašče ŭ lutym, padčas zboraŭ u Turcyi. Paśla pačałasia pnieŭmanija z uskładnieńniami, jakaja vielmi ciažka lačyłasia, bo Kapski raniej mieŭ vialikija prablemy z sercam. U 2013 hodzie Anatol Kapski taksama zachvareŭ na pnieŭmaniju. Pačalisia ŭskładnieńni, u Vilni jon pieranios surjoznuju apieracyju na sercy. Paśla apieracyi Kapski pravioŭ try dni ŭ komie — byli prablemy z nyrkami i piečańniu.
Sioleta, na ščaście, abyjšłosia biez padobnych prablemaŭ i biez apieracyj. Ale lačeńnie i adnaŭleńnie zaniali praciahły čas. Niekatory čas Kapski pravioŭ u balnicy. Ciapier užo jon znachodzicca doma.
U kłubie kažuć, što Kapski nieŭzabavie vierniecca na pracu.
«Anatol Anatolevič peŭny čas adsutničaŭ praz prablemy sa zdaroŭjem, ale ŭ najbližejšy čas jon vierniecca da pracy ŭ kłubie», — paviedamili «Našaj Nivie» u pres-słužbie BATE.
Prablemy sa zdaroŭjem pieraśledavali Kapskaha z samaha dziacinstva. Adrazu paśla naradžeńnia jon zachvareŭ na zapaleńnie lohkich, u piacihadovym uzroście zvaliŭsia z pryčepa i razdrabiŭ tazaściehnavuju kostku. Paźniej u 20-hadovaha Kapskaha znajšli rak. Jon prajšoŭ kurs lačeńnia, ale ŭ 1999 hodzie chvaroba viarnułasia. Kapski lačyŭsia za miažoj.
Kamientary