Zboračnuju vytvorčaść techniki «Amkador» płanujecca adkryć u Jehipcie, paviedamiŭ siońnia žurnalistam ministr antymanapolnaha rehulavańnia i handlu Uładzimir Kałtovič pa vynikach biełaruska-jehipieckaj sumiesnaj handlovaj kamisii, pieradaje BIEŁTA.
«Na zaklučnaj stadyi znachodziacca damoŭlenaści pa stvareńni ŭ Jehipcie zboračnaj vytvorčaści «Amkador». Jehipieckaja delehacyja ŭčora naviedała heta pradpryjemstva, jana adznačyła vysokuju jakaść pradukcyi pradpryjemstva i zacikaŭlena ŭ supracoŭnictvie», — skazaŭ Uładzimir Kałtovič.
Pavodle jaho słoŭ, Jehipiet taksama zacikaŭleny ŭ supracoŭnictvie ź Biełaruśsiu ŭ halinie transpartu, ab čym išła razmova na pierahavorach ź vice-premjeram Uładzimiram Siamaškam i ministram transpartu i kamunikacyj Anatolem Sivakom. «Abmierkavany try napramki ŭzajemadziejańnia. Pieršy — madernizacyja naziemnaha transpartu (aŭtobusy, tralejbusy, tramvai). Druhi — pavieličeńnie hruzaabarotu i mižrehijalnych pieravozak: jehipiecki bok stavić zadaču pavialičyć u 10 razoŭ abjom hruzapieravozak. Treci - rekanstrukcyja čyhunačnaha transpartu. Abmierkavany našy mahčymaści ŭ halinie pastavak ruchomaha sastavu, jehipiecki bok vykazaŭ zacikaŭlenaść u hetaj temie», — raskazaŭ ministr.
Akramia taho, namiečany surjoznyja prajekty ŭ halinie sielskaj haspadarki. «Jehipiet vydzieliŭ dla našaha ahulnaha prajekta ziamielny ŭčastak, stvorana rabočaja hrupa ŭ chodzie siońniašniaj kamisii. Biełaruski bok uznačalić adzin z namieśnikaŭ ministra sielskaj haspadarki i charčavańnia. U bližejšy čas rabočaja hrupa naviedaje Jehipiet, dzie budzie prapracavana pytańnie pa vykarystańni biełaruskich technałohij pry budaŭnictvie ahraharadkoŭ, małočnatavarnych fierm», — adznačyŭ Uładzimir Kałtovič.
U svaju čarhu ministr handlu i pramysłovaści Jehipta Taryk Kabil acaniŭ pierahavory jehipieckaj delehacyi z namieśnikam premjer-ministra Uładzimiram Siamaškam i ministram zamiežnych spraŭ Uładzimiram Makiejem jak plonnyja. «My abmiarkoŭvali novyja napramki dvuchbakovaha supracoŭnictva. My pasprabujem skancentravać našu ŭvahu na raźvićci pramysłovaj kaapieracyi i inviestycyjnaha supracoŭnictva», — skazaŭ jon.
Kamientary