Bajavik ŁNR, jaki abiacaŭ razahnać Majdan u Biełarusi, nakiravany ŭ ŁPP
Były bajavik ŁNR Ivan Jaravy, jaki vajavaŭ na Danbasie suprać Ukrainy ź listapada 2014-ha pa žnivień 2016-ha hodu, 25 traŭnia nakiravany sudom Kruhlanskaha rajonu ŭ lačebna-pracoŭny prafiłaktoryj (ŁPP).
Pra heta paviedamiŭ «Biełsatu» sam Ivan Jaravy.
Sa słoŭ eks-bajevika, z momantu viartańnia ŭ Biełaruś z Danbasu (žnivień 2016 hodu) jon trojčy pryciahvaŭsia da administratyŭnaj adkaznaści pa art. 17.3KaAP (znachodžańnie ŭ hramadskim miescy ŭ niećviarozym stanie), što i stała padstavaj dla nakiravańnia ŭ ŁPP. Apošni pratakoł suprać Jaravoha milicyja skłała paśla taho, jak były bajec ŁNR «adśviatkavaŭ» Dzień Pieramohi 9 traŭnia.
«Nijakich pozvaŭ nie było. Ranicaj a 6-j zabrali z domu, zavieźli ŭ RAUS. Potym pavieźli na sud i hod ŁPP tam abviaścili (12 miesiacaŭ — maksimalny termin znachodžańnia ŭ ŁPP, — «Biełsat»). Na sudzie prakuror tolki kazaŭ, advakat maŭčała. Sud chvilin 10 doŭžyŭsia», — raspavioŭ Jaravy.
Kali Jaravy nie abskardzić rašeńnie sudu, to praz 10 dzion rašeńnie ŭstupić u siłu i jaho nakirujuć u ŁPP.
Sistema ŁPP praduhledžvaje izalacyju asobaŭ, jakija pakutujuć na ałkahalizm i narkamaniju. Pry hetym hramadzianie ŭ ŁPP nie źjaŭlajucca asudžanymi da pazbaŭleńnia abo abmiežavańnia voli i nie ličacca administratyŭna aryštavanymi.
27-hadovy Ivan Jaravy z pazyŭnym «Puškin» staŭ viadomaj asobaj u Biełarusi ŭ lutym 2016-ha. Na Danbasie Ivan Jaravy vajavaŭ u šerahach «Kazackaha pałkaJarHA». U kastryčniku 2015 hodu, paśla taho jak Ivan Jaravy źjeździŭ na pabyŭku dadomu, jaho zatrymali ŭ Voršy, pra što paviedamiła hazieta Administracyi prezidenta «SB. Biełaruś siehodnia» u artykule «Hastarbajtiery vajny» (numar ad 11 lutaha 2016 hodu). Nieŭzabavie Jaravy paćvierdziŭ radyjo «Svaboda», što jaho sapraŭdy zatrymlivali, ale praz tydzień vypuścili ź SIZA, papiaredziŭšy pra kryminalnuju adkaznaść za najomnictva. Paśla hetaha «Puškin» znoŭ pajechaŭ na vajnu.
Pačynajučy ź lutaha 2016-ha Jaravy niekalki razoŭ razmaŭlaŭ z žurnalistami niedziaržaŭnych ŚMI. U adnym ź intervju, u pryvatnaści, jon zajaviŭ: «Kali ŭ Biełarusi pačniecca Majdan, budu razhaniać. Ja suprać usich voś hetych… chto pa-biełarusku razmaŭlaje».
Błohier Anton Matolka nieadnarazova źviartaŭsia da siłavikoŭ z metaj vyśvietlić, čamu tyja spačatku zatrymali, a paśla adpuścili bajevika ŁNR. Ale nivodzin z pravaachoŭnych orhanaŭ adkaznaść za zatrymańnie Ivana Jaravoha na siabie tak i nia ŭziaŭ.
U žniŭni 2016-ha Jaravy pakinuŭ Danbas i viarnuŭsia ŭ svoj rodny horad Kruhłaje. Paśla viartańnia «Puškina» na radzimu pravaachoŭniki praviali ŭ jahonym domie niekalki pieratrusaŭ, ale nijakich jurydyčnych pretenzijaŭ da bajevika ŁNR nie mieli.
Kamientary