Uładalnik hrupy kampanij JESN i tabłoida «Komsomolskaja pravda» Ryhor Biarozkin kupiŭ u struktur miljardera Michaiła Procharava kantrolny pakiet chołdynhu RBK.
Heta moža pryvieści da źmieny redakcyjnaj palityki: papiaredniaja nie zadavalniała Kreml.
RBK — adzin z najbujniejšych pryvatnych miedyjachołdynhaŭ u Rasii, jaki pracuje z 1993 hoda. U jaho ŭvachodziać sajt, hazieta, časopis, telekanał, słužba chostynhaŭ i niekalki servisaŭ.
Sajt RBK — adzin z najbolš naviedvalnych i cytavanych ŚMI ŭ internecie. U sakaviku 2017 hoda aŭdytoryja RBK pieravysiła 23 młn unikalnych naviedvalnikaŭ.
Hrupa JESN Biarozkina vałodaje naftavymi terminałami i enierhatrejdaraŭ. Taksama JESN naležyć kantrolny pakiet vydavieckaha doma «Komsomolskaja pravda» — haziety, jakuju prezident Rasii Uładzimir Pucin nazyvaŭ svajoj lubimaj.
Procharaŭ pryniaŭ rašeńnie ab prodažy chołdynhu pad ciskam administracyi prezidenta, kažuć krynica Bi-bi-si ŭ kiraŭnictvie chołdynhu i surazmoŭca, blizkaja da administracyi prezidenta.
«Jon doŭha ŭpiraŭsia, ale jaho pierakanali. Nie skazać, što jon mocna ščaślivy — rašeńnie pryniata pad ciskam», — kaža adzin z surazmoŭcaŭ Bi-bi-si.
Biznesmien Procharaŭ, jaki zajmaje 13-je miesca ŭ rejtynhu najbahaciejšych ludziej Rasii pa viersii Forbes, vałodaje kantrolnym pakietam RBK z 2010 hoda. Z tych časoŭ Procharaŭ paśpieŭ prajści šlach publičnaha palityka — stać na čale partyi «Pravaja sprava», a zatym syści ź jaje. U 2012 hodzie jon vystaŭlaŭ svaju kandydaturu na vybarach prezidenta Rasii.
U kancy 2014 hoda RBK pierazapuściŭ sajt, hazietu i časopis RBK, vydańnie stała publikavać žurnalisckija rasśledavańni.
U 2014 hodzie ŭ vydańni vyjšła rasśledavańnie ab kolkaści rasijskich vajskoŭcaŭ na paŭdniovym uschodzie Ukrainy. A ŭ 2015 hodzie — ab Kaciarynie Cichanavaj, jakuju paźniej ahienctva Rejter nazvała dačkoj Pucina.
Jak pisali «Viedomosti», takija materyjały RBK vyklikali «vielmi mocnaje razdražnieńnie» čynoŭnikaŭ, «cisnuli na Procharava, patrabujučy spynić takoje biazładździe».
Telekanał i sajt RBK aktyŭna aśviatlali mitynhi pratestu i ŭ 2017 hodzie. Pa achopie aŭdytoryi pryvatny chołdynh kankuravaŭ z najbujniejšymi dziaržaŭnymi ŚMI.
Naprykład, u sakaviku 2017-ha hoda, pa dadzienych ličylnika Liveinternet, aŭdytoryja RBK skłała 26,5 miljona čałaviek, aŭdytoryja RIA Novosti — 27,4 miljona.
Usio heta vyklikała niezadavolenaść administracyi prezidenta, kažuć dźvie krynicy Ruskaj słužby Bi-bi-si, blizkija da kiraŭnictva RBK, i paćviardžajuć surazmoŭcy Bi-bi-si, blizkija da Kramla.
«Vielmi mahutny» cisk nibyta idzie ad namieśnika kiraŭnika administracyi prezidenta Alaksieja Hromava (jon adkazvaje ŭ Kramli ŭ tym liku za infarmacyjnuju palityku).
Kreml niezadavoleny tym, što napiaredadni prezidenckich vybaraŭ 2018 hadoŭ u takim upłyvovym ŚMI vychodziać niazručnyja dla Kramla materyjały,
paviedamlajuć dva supracoŭniki chołdynhu ŭ razmovach ź Bi-bi-si. «Hromaŭ choča «vyklučyć «internet», — kaža adzin ź ich.
Prezidenckija vybary majuć tolki fonavaje značeńnie, ličyć ekśpiert Centra palityčnych technałohij Taćciana Stanavaja.
Na fonie vybaraŭ elity zmahajucca za resursy i paŭnamoctvy, pavyšajuć staŭki, ale vyrašalnuju rolu ŭ historyi z RBK adyhrała nazapašanaja niezadavolenaść siłavikoŭ.
Pavodle jaje słoŭ, siłaviki va ŭładzie bačać u RBK pahrozu lehitymnaści ŭłady i raschistvańnia režymu.
Pucin, adkazvajučy na pytańnie RBK pra cisk na chołdynh z boku Kramla, adkazaŭ: «Ja pra heta nie viedaju». Jon dadaŭ, što «takija srodki masavaj infarmacyi patrebnyja».
«Ja sam hladžu, mnie padabajecca», — skazaŭ prezident paśla «Pramoj linii», razmaŭlajučy z žurnalistami. Pa słovach Pucina, jon nie abmiarkoŭvaŭ mahčymuju ździełku ni z kim ź jaje ŭdzielnikaŭ, ale nie vyklučyŭ, što moža sustrecca z Procharavym u najbližejšy čas.
RBK pavinna być biznes-vydańniem i pisać mienavita pra biznes — taki padychod da redakcyjnaj palityki novaha ŭładalnika chołdynhu apisvajuć dvoje znajomych Biarozkina. Pa ich słovach, Biarozkin taksama źviartaŭ uvahu na zališniuju palityzavanaść vydańnia.
Pierad pieramovami ab kupli nibyta byŭ praviedzieny kantent-analiz publikacyj vydańnia. Na ich padstavie byccam by vyśvietliłasia, što zhadvalnaść Alaksieja Navalnaha paraŭnalnaja z kolkaściu paviedamleńniaŭ pra premjer-ministra RF Dźmitryja Miadźviedzieva, miarkuje adzin z surazmoŭcaŭ Bi-bi-si (pa dadzienych pošukavika google.com za apošni miesiac pra Navalnaha na sajcie 380 paviedamleńniaŭ, pra Miadźviedzieva 430 paviedamleńniaŭ).
U administracyi prezidenta takoje aśviatleńnie navin paličyli dyspraparcyjnym, Biarozkin z takim padychodam nibyta zhodny.
U RBK ŭsiaho hod tamu źmianiałasia kiraŭnictva redakcyi. U siaredzinie krasavika 2016 hoda ŭ ofisach kampanij Procharava praviali pieratrusy FSB i padatkaviki. Krynicy «Daždžu» tady kazali, što pieratrusy adbyvajucca z-za cisku na ŭładalnika chołdynhu.
Praź miesiac byŭ zvolnieny hałoŭny redaktar haziety RBK Maksim Solus. Rejter pisaŭ tady, što Kreml i da hetaha vykazvaŭ Procharavu i kiraŭnictvu chołdynhu pretenzii da aśviatleńnia skandału z «panamskim daśje».
Apošniaj kroplaj dla Kramla, raspaviadała ahienctva, staŭ artykuł pad zahałoŭkam «Nasuprać «pałaca Pucina» pad Hielendžykam pačnuć razvodzić vustryc».
Svaje pasady paśla zvalnieńnia Solusa pakinuli šef-redaktar Lizavieta Asiacinskaja i hałoŭny redaktar sajta Raman Badanin. Uśled za Asiacinskaj i Badaninym z RBK syšła vialikaja častka kamandy žurnalistaŭ.
Rasśledavańniaŭ u RBK pry novych kiraŭnikach stała sapraŭdy mienš, i ŭłasnych tekstaŭ pra siamju Pucina ŭ vydańni bolš nie pisali.
Pra cikavaść Biarozkina da RBK stała viadoma ŭ kancy krasavika - tady pra heta paviedamili ahienctva RNS i hazieta «Viedamaści». Zaraz JESN nabyła 65% akcyj i daŭhavyja abaviazacielstvy PAT «RBK», suma ŭhody nie raskryvajecca.
Biarozkin ŭ adkaz na ŭsie pytańni Bi-bi-si dasłaŭ karykaturu na karcinu Boscha z podpisam «Prosta ŭsio heta pryhniataje, niezdarovaja atmaśfiera niejkaja». Na pytańni pa sutnaści jon nie adkazaŭ.
Raźviedka ZŠA: Biełaruś stała pieradavym vajskovym płacdarmam Rasii24
Kamientary