«Kažuć, uziaŭ žonku z bahataj siamji». Palityk z Horadni sudzicca ź dziaržaŭnym TB
«Kamu jakaja sprava — jakaja ŭ mianie žonka?» — ździŭlajecca Vadzim Sarančukoŭ, jaki za abrazu reputacyi padaŭ na haradzienskaje telebačańnie ŭ sud.
Teleradyjokampanija «Hrodna» apublikavała repartaž «Maršam u nikudy» 18 krasavika.
Sutnaść materyjału — pakazać haradzienskuju apazicyju nie ŭ lepšym śviatle. Adzin z hierojaŭ siužetu — Vadzim Sarančukoŭ, kiraŭnik haradzienskaj filii partyi BNF — vyrašyŭ sudzicca z rehijanalnym kanałam.
Na jaho dumku, siužet maje abraźlivy charaktar dy škodzić dziełavoj reputacyi palityka. Pavodle Sarančukova, zdymki bolš nahadvali apieratyŭnyja kadry, a nie pracu žurnalistaŭ. Ułasna pradstaŭniku BNF pryśviacili amal dźvie chviliny času.
Vadzim aburany, što dziaržaŭnyja ideołahi vykarystali biez dazvołu zdymki, dzie znachodzicca jaho niapoŭnahadovaje dzicio, i naškodzili jaho reputacyi, jak pryvatnaj asoby, tak i ramieśnika.
«Biespadstaŭna śćviardžajecca, što ja falšyva zajmajusia pradprymalnickaj dziejnaściu — ramieśnictvam, — kaža palityk. — Kali vystaŭlajucca niejkija pretenzii pa maich asabistych jakaściach: naprykład, zajaŭlena, što ja ŭziaŭ sabie žonku z bahataj siamji. Jakaja ŭvohule kamu sprava — jakaja ŭ mianie žonka i dzie my ź joj paznajomilisia?»
«Budu baranić svoj honar i hodnaść praz sud»
U siužecie źviartajecca ŭvaha na toje, što palityk nibyta atrymoŭvaje finansavańnie ad «zamiežnych kurataraŭ» za svaju hramadskuju dziejnaść. Palityk padobnyja vykazvańni ličyć paklopam, tym bolš siužet vyjšaŭ u efir z parušeńniami.
«Adnym z parušeńniem dziejnaha zakanadaŭstva było toje, što videasiužet byŭ ananimnym, — kaža Sarančukoŭ. — Ja budu abaraniać svoj honar i svaju hodnaść praz sud».
Sarančukoŭ patrabuje, kab była nazvanaja asoba, jakaja adkaznaja za vypusk dadzienaha materyjału, nastojvaje na publičnym vybačeńni i abviaržeńni infarmacyi teleradyjokampanijaj «Hrodna», padadzienaj u materyjale «Maršam u nikudy».
Akramia Vadzima Sarančukova ŭ siužecie «niadobrym słovam» uzhadali siabra BCHD Sieržuka Vieramiejenku, pradstaŭnika AHP Ježy Hryhienčy, siabra «Havary praŭdu» Dźmitryja Bandarčuka, aktyvista ruchu «Za svabodu» Vadzima Levana dy Valancinu Navumavu z partyi «Spraviadlivy śviet».
Vyjavić aŭtara siužetu nibyta niemahčyma
U haradzienskim Leninskim rajonnym sudzie siońnia prajšło apytańnie pa dadzienaj hramadzianskaj spravie, jakoje viała sudździa Ksienija Stasiukievič. Na padrychtoŭčaj častcy pierad sudom pradstaŭnik haradzienskaj teleradyjokampanii zajaviŭ, što videasiužet padrychtavaŭ ceły kalektyŭ aŭtaraŭ, tamu niemahčyma ŭkazać asobu aŭtara, a adkaz pryjdziecca na ŭsiu redakcyju.
Cikava, što apytańnie pa hetaj spravie sudździa viała pa-biełarusku, choć hetamu praciviŭsia pradstaŭnik teleradyjokampanii «Hrodna».
Prysutnyja na pasiedžańni ćvierdziać, što sud schilajecca na bok teleradyjokampanii. Pakul bakam dali čas pajści na ŭhodu, nastupnaje pasiedžańnie — 6-ha lipienia.
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary