Aŭtarka prajekta Humans of Minsk apublikavała novuju fotahistoryju #takajakakiesť375, što ździŭlaje i zachaplaje svajoj ščyraściu i adkrytaściu. Žančyny na zdymkach raspaviali, jak jany pryniali svaje formy i navučylisia być ščaślivymi va ŭłasnym ciele.
My pryvodzim tolki vytrymki apoviedaŭ. Całkam historyi vy možacie pračytać na staroncy prajekta.
Daša, 29 hadoŭ, fotažurnalistka, aŭtarka prajekta Humans of Minsk, synu 1 hod i 4 miesiacy
«…Potym ja pastupiła va ŭniviersitet, i tady mnie stali rabić kamplimienty z nahody hrudziej. Mnie zdavałasia, što ŭ ich niama ničoha asablivaha — usio hetak ža, jak i ŭ inšych. Ale kali ty žyvieš u internacie z prahramistami, to zaŭvažaješ uvahu, razumieješ, što kali ranicaj ty pajšła ŭ majcy biez stanika na kuchniu pastavić čajnik — usie pačynajuć uśmichacca, stanoviacca bolš pryjaznymi.
Raniej ja mahła kupić top z dekalte, mnie padabałasia hetaja ŭvaha, tamu što ja adčuvała, što heta byŭ moj kozyr. Ciapier razumieju, što ja hetym manipulavała. Heta ŭzrost 18-20 hadoŭ, kali ty šukaješ siabie. Potym usio pastupova źmianiłasia. Ciapier mnie nie chočacca, kab chtości zaziraŭ u majo dekalte, ja chaču, kab mnie hladzieli ŭ vočy, chaču, kab uva mnie bačyli asobu, a nie seksualny abjekt i nośbita niejkaha tam pamieru hrudziej. U asnoŭnym maje siabry — mužčyny. I ja chaču, kab mianie ŭsprymali jak siabra, tamu ja śviadoma nie nadziaju nijakich vyrazaŭ, ničoha nie padkreślivaju. Navošta ŭsio ŭskładniać? U mianie jość adzin mužčyna, jakoha ja chaču spakušać, — heta moj muž.
Hramadstva zahulałasia, ci što. Tamu što hrudzi — heta małočnaja załoza. Jana pryrodaj prydumanaja dla kankretnych met. I jaje seksualnaja abjektyvizacyja — heta dziŭnaja hulnia».
Vola, 30 hadoŭ, fatohraf, dačce 6 hadoŭ
«Moj adnakłaśnik Dzima, ź jakim ja, zdajecca, tady sustrakałasia, hladzieŭ z 4-j party na maju 5-ju, a kłasucha jamu kaža: «Dzima, paviarnisia da doški!» A jon kaža: «Ja da doški i paviarnuŭsia». Ja vielmi śmiajałasia razam z usim kłasam, i heta było apošniaj kroplaj, kab pryniać siabie: ja — takaja.
Tak ja siabie pryniała i palubiła. Pamier AA — heta zručna. Biehać zručna, navat karmić dačku było zručna, bo hrudzi nie razdźmuła. Było vielmi kamfortna, a potym usio viarnułasia ŭ daciažarny stan — ničoha nie abvisła, pamier AAA — heta najlepšy pamier».
Hanna, 34 hady, psichaterapieŭt, synu 1 hod i 4 miesiacy
«…Voś prosty prykład: mužčynskija jaječki taksama adroźnivajucca pa pamiery i raźmieščany asimietryčna, ale heta prosta bijałahičny fakt, i nichto nie akcentuje na hetym uvahu, heta ŭsprymajecca jak dadzienaść, u toj čas jak hrudzi «pavinny» być pryhožymi, adnolkavymi i kab hanarliva tyrčali smočki…
Ja i sama pieražyvała jakraz praz hetuju asimietryju, a kali pačała karmić hrudźmi, jana stała jašče bolš zaŭvažnaj. Ja złaviła siabie na tym, što imknusia nieśviadoma niejak žanhlavać prykładańnie da hrudziej, kab niešta nibyta skarektavać, choć maich mužčyn — i muža, i syna — maje hrudzi całkam zadavalniajuć. Heta i śmiešna, i sumna».
Lena, 31 hod, kantent-mieniedžarka, synu 7 hadoŭ
«U šmathadovych pošukach svajoj idealnaj bializny ja zrabiła niamała adkryćciaŭ. Z apošnich: prychodziš u brendavuju kramu, a ŭsio, što mohuć prapanavać na pamier 75A, — heta 70B z puš-apam. Kansultanty časta pierakonvajuć, što na pamier A prosta niama popytu. Ale ŭžo ŭ Bierlinie ŭ tych ža brendaŭ ja spakojna znachodžu stanik svajho pamieru. Čamu? Našy žančyny nastolki nie lubiać siabie, što nie kuplajuć pamier A biez parałonu?»
Volha, 34 hady, ekanamist, dvoje dziaciej
«Byŭ momant u žyćci, kali ja chadziła łysaja — haliła hałavu. Heta była bolš fizijałahičnaja patreba: u mianie ałapiecyja. Ja razumieła, što na mianie ŭsie hladziać, časta navat nie pytajucca — prosta niešta dumajuć. Ałapiecyja abvastryłasia paśla naradžeńnia i karmleńnia hrudźmi pieršaha dziciaci. Choć, mahčyma, heta padzieja ŭ žyćci i ni pry čym.
Kali pra prablemu ŭvieś čas dumać — moža pajechać dach. Kali ŭsio pačałosia, chaciełasia razabracca ŭ tym, što adbyvajecca. Pačalisia daktary, abśledavańni. Kožny doktar u tabie niešta znachodzić — ščytavidka, nadnyračniki, imunahrama. Heta nahniatajecca analizami, daviedkami, razmovami. Heta sumna. Ale kali ty adpuskaješ i rassłablaješsia, tady i vałasy pačynajuć raści i nie tak mocna vypadać.
Moj vobraz zaležyć ad majho nastroju. Časam chočacca nadzieć abcas i sukienku i «pahulać u intelihiencyju» — kali idu ŭ teatr. Lublu paviazać chustku abo być chatniaj haspadyniaj. Bializnu ja kuplaju vyklučna dla siabie — jana pavinna być zručnaj».
Kacia, 31 hod, žurnalistka, dačce 9 hadoŭ
«Va ŭsich situacyjach, jakija składvalisia nie tak, jak ja chacieła, vinavatyja byli nievialikija załozy ŭ vierchniaj častcy majho tułava. Heta vielmi zručna. Sukienka nie siadzić? Hrudzi vinavatyja. Seks drenny? Prosta cycki jaho nie ŭzbudžajuć. Zajmajusia niecikavaj pracaj? Tamu što niaŭpeŭnienaja ŭ sabie. I ŭsio — praz maleńkija hrudzi!
…
Ale praŭda i ŭ tym, što ludzi, jakija naviazvajuć mierkavańnie, što luboŭ i zachapleńnie naležać tolki ŭładalnicy niejkaha adnaho typu źniešnaści, abmiažoŭvajuć i nas, i siabie samich. Moža, u dušy jany ŭsie kociki, ale mnie ź imi nie pa darozie. Mnie nie padabacca stvarać śviet, dzie ludziej dzielać na bolš ci mienš hodnych dobraha žyćcia. Ja liču, što adzinaja jakaść, jakoj pavinny vałodać pretendenty na ščaście — heta być žyvymi. Sa svajoj adčuvalnaściu, niepraktyčnymi prajektami, durackimi artykułami i maleńkimi cyckami, ja chaču žyć.
Spadziajusia, maje hrudzi kali-niebudź darujuć mnie toje, što ja sprabavała va ŭsich svaich niaščaściach abvinavacić ich. Uvieś hety čas jany byli zusim ni pry čym».
Maryna, 32 hady, supiervajzier u adździele HR, dačce 7 hadoŭ
Niekalki hadoŭ tamu ja schudnieła prykładna na 5 kiłahramaŭ i atrymała, jak havorycca ŭ narodzie, «minus pieršy»))) Maleńkija hrudzi — heta adno, adsutnaść mahčymaści kupić bializnu — užo zusim inšaje. Tamu što z hetaha momantu pakupka pryhožaha stanika pieratvaryłasia ŭ piekła. Ad adnoj dumki pačynaje dryhać pavieka. U absalutna pieravažnaj kolkaści bializny z pamieram 75A mnie vialiki pamier čaški. A pamier 70A mnie adkryta mały ŭ achopie hrudnoj kletki. Parada kupić admysłovuju ŭstaŭku dla zašpilki, jakaja pavialičvaje abjom stanika pa achopie hrudziej, nie padychodzić — čaški ŭ 70-ch pamierach pastaŭlenyja zanadta blizka dla majoj fihury, i, jak by iranična u maim vypadku heta ni hučała, hrudzi nie źmiaščajucca. Na pytańnie pra pamier 75AA pradaŭcy razvodziać rukami — čaška AA ličycca «padletkavaj» i idzie tolki z abjomam hrudziej 70. Tamu padabrać taki biusthaltar pamieru 75A, jaki (o dziva!) dobra siadzie i pry hetym tam nie budzie 80% parałonu z varjackim puš-apam abo ružovych zajčykaŭ na žoŭtym fonie, — heta prosta śviata niejkaje!
Tak my z maimi cyckami i žyviom: źlohku pakryŭdziŭšysia adno na adnaho, adznačajem nabyćcio kožnaha kamplekta pryhožaj bializny».
Maša, 30 hadoŭ, žurnalistka
«Ja nadziaju stanik tolki na treniroŭki. U astatni čas mnie bolš utulna bieź jaho. Kali kahości i chvalujuć maje smočki, što adhadvajucca skroź futbołku, heta nie maja prablema. Mianie jakraz ludzi ŭzbudžajuć nie frahmientami cieł, a całkam».
Jula, 31 hod
«…Voś paplečnicy pišuć cikavaje: jakoje spodniaje varta nadziavać 25 sakavika. Asabistaje — heta palityčnaje, navat kali heta prosta majtki i staniki.
Dyk voś, pišuć dziaŭčyny, ni ŭ jakim razie nielha staniki z kostačkami. Zabiaruć.
U mianie ŭ rukach karunkavy stanik i manikiurnyje nažnicy. Ja rablu dźvie maleńkija dzirački, dastaju mietaličnyja kostački i kruču ich u rukach. Sapraŭdy, ich ža možna zavastryć i ŭskryć imi vieny abo paranić sakamiernic ci navat kaho-niebudź z achovy. Vyrabić admyčku, pierapiłavać kraty, arhanizavać ucioki, uziać zakładnikaŭ i zvalić ŭ Panamu.
Karunkavyja staniki — heta lehkadumnyja niedaŭhaviečnyja matyli siarod žanočaj bializny. Ich nie nadzienieš pad trykatažnuju majku, pad tonkuju sukienku, pad švedar, pad — što tam jašče ja našu? Usie sučasnyja žančyny viedajuć: tolki hładkija staniki cialesnaha koleru. Mastchev, jak pišuć modnyja błohiery, jakich my ŭsie, viadoma, nie čytajem, my čytajem «Miedyjazonu» i «Mieduzu». Dyk voś, takich — cialesnych, ciesnych, pad roznyja vyrazy i projmy, roznych fasonaŭ — u mianie niekalki, i ŭsie jany z kostačkami, i jany sapraŭdy patrebnyja. Inšaja sprava — karunkavaje svavolstva, jaho i parezać nie škada na patreby revalucyi».
Natalla, 35 hadoŭ, paetka
«U škole chłopčyki pryciskali nas da ścienki i macali, ci vyraśli ŭžo hrudzi, i hučna paviedamlali pra vyniki adno adnamu. Abo pravodzili rukoj pa śpinie, kab pravieryć, jość stanik ci nie. Heta było vielmi źnievažalna, dahetul pamiataju heta pačućcio.
Cycki doŭha nie raśli, a kali narešcie vyraśli, byli takija maleńkija i niejkija ŭsie niapravilnyja, nie atrymlivałasia ź ich (ź imi?) dekalte, nie atrymlivałasia «pravilnaja» forma biez staniku. Ale pastupova jana mnie stała padabacca: takaja čaroŭnaja reč, daskanałaść formy, pryhoža, kali napružvajucca smočki. Mianie ŭzbudžajuć maje ŭłasnyja cycki».
Maryna, 48 hadoŭ, muzyka, synam 19 i 10 hadoŭ
«Moładź parycca pra pamiery, ja — nie. Ja čałaviek, jaki vyras na pryrodzie i ŭ harmonii z pryrodaj. I padabałasia mužčynam — na pamier nichto nie źviartaŭ uvahi, mnie było pra što ź imi pahavaryć».
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali22
Kamientary