Što stała z naviedvalnaściu rasijskich sacsietak va Ukrainie paśla ich zabarony?
Užo bolš za miesiac prajšło z momantu zabarony va Ukrainie rasijskich internet-resursaŭ «Ukantakcie», «Adnakłaśniki», «Jandeks» i «Mail.Ru». Ukrainskaje vydańnie «Jekonomična pravda» praanalizavała, jak hetaja zabarona paŭpłyvała na naviedvalnaść hetych sajtaŭ.
Ciapier naviedvalnaść rasijskaj sacyjalnaj sietki «Ukantakcie» składaje kala 3,8 młn unikalnych vizitaŭ z desktopaŭ u dzień. Da ŭviadzieńnia sankcyj hety pakazčyk składaŭ kala 9,8 młn. Takim čynam, aŭdytoryja hetaj sacyjalnaj sietki skaraciłasia prykładna na 61%.
Naviedvalnaść «Adnakłaśnikaŭ» źmienšyłasia na 64% — z 4,6 młn da 1,6 młn vizitaŭ u dzień.
Skaračeńnie pamieru ŭkrainskaj aŭdytoryi «Jandeksa» dasiahnuła 65% — z 5,9 młn da 2 młn vizitaŭ u dzień.
Internet-partał Mail.Ru straciŭ 55% ukrainskaj aŭdytoryi. Kolkaść unikalnych naviedvańniaŭ skaraciłasia z 4,9 młn da 2,2 młn.
Statystyka ŭličvaje pierachody na sajty z desktopnych pryład. Jana taksama ŭklučaje tych karystalnikaŭ z Ukrainy, jakija zachodzili na zabłakavanyja resursy z dapamohaj VPN.
U jakaści alternatyvy rasijskim sacsietkam va Ukrainie pačali stvarać šmatlikija ŭnutryŭkrainskija anałahi: UkrOpen, C.ukr, Ukrface, Ukrainians i inšyja. Ale nivodnaja ź ich pakul nie nabliziłasia pa papularnaści da Facebook ci «Ukantakcie». Ekśpierty nie dumajuć, što hetyja sacsietki stanuć paśpiachovymi, bo nacyjanalnaja prynaležnaść — reč niecharakternaja dla sučasnych sacyjalnych sietak, jakija imknucca być mižnarodnymi.
U svaju čarhu pośpiechi inšych sacsietak kudy bolš vidavočnyja. Tolki za pieršyja sutki błakiroŭki štodzionnaja aŭdytoryja Facebook vyrasła na 35%. Usiaho ŭkrainskaja aŭdytoryja Facebook vyrasła z 6,5 młn da 9 młn karystalnikaŭ. Aŭdytoryja Instagram uzrasła jašče bolš — z 3,8 młn da 5,6 młn.
Nahadajem, 15 maja prezident Ukrainy Piatro Parašenka svaim ukazam uvioŭ u dziejańnie rašeńnie Rady nacyjanalnaj biaśpieki i abarony Ukrainy «Pra prymianieńnie piersanalnych śpiecyjalnych ekanamičnych i inšych abmiežavalnych mier (sankcyj), jakija praduhledžvajuć błakavańnie Mail.ru, «Jandeks», sacyjalnych sietak «Ukantakcie» i «Adnakłaśniki».
Ciapier čytajuć
Połk Kalinoŭskaha paviedamiŭ pra hibiel troch bajcoŭ7
Kamientary