Haścinicy i siadziby pavinny buduć infarmavać milicyju ab inšaziemcach na praciahu troch hadzin
Z 1 kastryčnika 2017 hoda haścinicy, sanatoryi, ahrasiadziby, a taksama jurydyčnyja asoby i IP, jakija zdajuć žyllo turystam, pavinny buduć na praciahu troch hadzin paviedamić u orhany ŭnutranych spraŭ infarmacyju pra inšaziemcaŭ, jakija tudy zasialilisia, paviedamlaje Tut.by sa spasyłkaj na pres-słužbu MUS.
«Źmianiajecca paradak pradstaŭleńnia ŭ orhan unutranych spraŭ haścinicami, sanatorna-kurortnymi i azdaraŭlenčymi arhanizacyjami, subjektami ahraekaturyzmu, jurydyčnymi asobami i indyvidualnymi pradprymalnikami, jakija akazvajuć pasłuhi pa zdačy ŭ najom (padnajom) žyłych pamiaškańniaŭ, infarmacyi pra zamiežnych hramadzian i asob biez hramadzianstva, jakija časova znachodziacca ŭ Biełarusi.
Z 1 kastryčnika 2017 hoda takaja infarmacyja pavinna pieradavacca z dapamohaj infarmacyjnych resursaŭ (sistem) MUS Biełarusi abo adzinaha partała elektronnych pasłuh ahulnadziaržaŭnaj aŭtamatyzavanaj infarmacyjnaj sistemy albo naračnym», — skazana ŭ paviedamleńni.
Da nazvanaj daty infarmacyja pieradajecca pa kanałach elektronnaj suviazi abo naračnym.
Z 1 kastryčnika 2017 hoda padać źviestki ab inšaziemcach nieabchodna na praciahu troch hadzin. Raniej termin składaŭ 24 hadziny z momantu zasialeńnia.
Raniej u Departamiencie pa hramadzianstvie i mihracyi MUS tłumačyli, što skaračeńniem terminu, u jaki nieabchodna paviedamić pra zamiežnika, što zasialiŭsia ŭ haścinicu ci siadzibu, nichto nie płanuje ŭskładniać praces pryjomu turystaŭ i paharšać biznes. Takija źmianieńni nakiravanyja na toje, kab apieratyŭna atrymać infarmacyju.
Nahadajem, ciapier, kali zamiežniki płanujuć pravieści ŭ Biełarusi bolš za piać dzion, to im abaviazkova treba zarehistravacca. Heta možna zrabić u haścinicy ci ahrasiadzibie. Ale kali turyst aranduje kvateru ci pryjedzie da rodnych, to rabić heta pryjdziecca ŭ miascovym adździele pa hramadzianstvie i mihracyi.
Vyklučeńnie z praviła — turysty, jakija pryjechali na vychadnyja abo dziaržaŭnyja śviaty. Taksama vyzvalajuć ad rehistracyi na praciahu 90 dzion z dnia ŭjezdu rasijan, a na praciahu 30 dzion z dnia ŭjezdu — litoŭcaŭ, łatvijcaŭ, ukraincaŭ i kazachaŭ.
Kamientary