Parłamienckaja asambleja Savieta Jeŭropy asudziła vyniasieńnie dvuch novych śmiarotnych prysudaŭ u Biełarusi. «Pryjšoŭ čas spynić heta», — havorycca ŭ sumiesnaj zajavie śpiecdakładčykaŭ PASIE pa admienie śmiarotnaha pakarańnia Iva Kruštana i pa situacyi ŭ Biełarusi Andrea Ryhoni.
«Parłamienckaja asambleja znoŭ i znoŭ paćviardžaje svajo absalutnaje niepryniaćcie śmiarotnaha pakarańnia, jakoje razhladaje jak akt katavańniaŭ i biesčałaviečnaha, źnievažalnaha hodnaść abychodžańnia i, biassprečna, jak samaje surjoznaje z usich parušeńniaŭ pravoŭ čałavieka», — skazana ŭ zajavie.
«My jašče raz zaklikajem biełaruskija ŭłady dałučycca da jeŭrapiejskaj siamji abalicyjanistaŭ, uvioŭšy ŭ terminovym paradku maratoryj na śmiarotnaje pakarańnie. Ništo ŭ Kanstytucyi ci zakanadaŭstvie Biełarusi nie pieraškadžaje prezidentu Łukašenku ci parłamientu zrabić hety krok», —cytuje zajavu TUT.by.
21 lipienia ŭ Mahilovie byli asudžanyja na rasstreł dvoje «čornych ryełtaraŭ»: Ihar Hieršankoŭ i Siamion Bieražny. Jašče dva fihuranta spravy atrymali doŭhija terminy źniavoleńnia: Taćciana Hieršankova — 24 hady, Barys Kaleśnikaŭ — 22 hady i 1 miesiac.
U toj ža dzień z zaklikam uvieści maratoryj na śmiarotnaje pakarańnie ŭ Biełarusi vystupili hienieralny sakratar Savieta Jeŭropy Turbjorn Jahłand i pres-sakratar Jeŭrapiejskaj słužby źniešnich dziejańniaŭ Maja Kačyjančyč.
Biełaruś zastajecca adzinaj jeŭrapiejskaj krainaj, jakaja ŭžyvaje śmiarotnaje pakarańnie, ale nie hatovaja mianiać svajo zakanadaŭstva. Arhumientujučy heta ŭdzielnikam siesii Parłamienckaj asamblei ABSIE, Alaksandr Łukašenka spasyłajecca na vyniki refierenduma 20-hadovaj daŭniny: «Nas zaklikajuć da admieny śmiarotnaha pakarańnia. My hetyja prapanovy čujem, i nie tolki čujem. Ale suprać voli naroda, pieravažnaja častka jakoha na refierendumie vykazałasia za jaho zachavańnie, ni adna dziaržava pajści nie moža. Ni adna cyvilizavanaje jeŭrapiejskaja dziaržava».
Ciapier čytajuć
Miedyjny pres-sakratar MNS Vital Damboŭski pajšoŭ u psichołahi-seksołahi6
Kamientary