Prezident ZŠA Donald Tramp zajaviŭ, što rasčaravany biaździejnaściu kitajskich uładaŭ u situacyi vakoł KNDR.
«Ja vielmi rasčaravany ŭ Kitai. Papiarednija durnyja lidary dazvolili jamu zarablać sotni miljonaŭ dalaraŭ u hod na handli, a jon nie robić dla nas ničoha ŭ situacyi z Paŭnočnaj Karejaj, a tolki havoryć», - cytuje Bi-bi-si zapis Trampa u jaho «Tvitary».
ZŠA nie dazvolać, kab heta praciahvałasia, pakolki Kitaj «lohka moža vyrašyć hetuju prablemu», dadaŭ amierykanski prezident.
Za dzień da hetaha Paŭnočnaja Kareja ździejśniła druhi za miesiac zapusk mižkantynientalnaj balistyčnaj rakiety.
Paŭnočnakarejski lider Kim Čen Yn paźniej zajaviŭ, što novaje rakietnaje vyprabavańnie dakazvaje, što ŭsie terytoryja ZŠA ciapier znachodzicca ŭ zonie paražeńnia paŭnočnakarejskich rakiet.
U subotu dva amierykanskija bambaviki B-1 pralacieli nad Karejskim paŭvostravam ŭ supravadžeńni paŭdniovakarejskich i japonskich samalotaŭ. Takim čynam vajennyja prademanstravali «nieparušnuju prychilnaść ZŠA svaim sajuźnikam», zajavili ŭ kamandavańni VPS ZŠA pa cichaakijanskim rehijonie.
U subotu Kitaj asudziŭ vyprabavańnie KNDR i zaklikaŭ usie baki da strymanaści.
Tady ž dziarždepartamient ZŠA vypuściŭ zajavu, dzie zaklikaŭ zrabić bolš žorstkim sankcyi AAN suprać KNDR.
Rasija i Kitaj niasuć «unikalnuju i asablivuju adkaznaść» za pahrozu dla rehijanalnaj i hłabalnaj stabilnaści, jakaja raście, pakolki źjaŭlajucca «hałoŭnymi krynicami ekanamičnaj padtrymki jadziernaj zbroi Paŭnočnaj Karei i prahramy raźvićcia balistyčnych rakiet», zajavili ŭ amierykanskim ministerstvie.
Čarhovaje vyprabavańnie rakiety stała 14-m zapuskam u hetym hodzie, ažyćcioŭlenym nasupierak rezalucyjam AAN.
Kamientary