Žycharka vioski Ziabraŭka, što ŭ Homielskim rajonie, pojdzie pad sud za zabojstva ŭłasnaha syna.
U kastryčniku minułaha hoda 29-hadovaja žančyna daviedałasia, što ciažarnaja. Ale svajo stanovišča jana vyrašyła nie afišavać, nie viedaŭ navat jaje ŭłasny baćka, jaki pražyvaje ŭ druhoj pałovie ahulnaha doma. Navinoj budučaja maci padzialiłasia tolki ź dźviuma siabroŭkami.
Na ich pytańni, što jana źbirajecca rabić ź dziciem, žartam adkazvała, što narodzić i vykinie.
Na ŭlik u žanočuju kansultacyju žančyna nie stanaviłasia, pa miedycynskuju dapamohu nie źviartałasia.
Z materyjałaŭ spravy vynikaje, što budučaja maci i sama nie viedała, ad kaho zaciažaryła. Darečy, ad pieršaha dziciaci, jakoha žančyna naradziła ŭ 2011 hodzie, jana admoviłasia, pakinuŭšy jaho ŭ špitali.
U kancy krasavika nočču va ŭłasnym domie jana ŭ adzinocie naradziła chłopčyka.
«Zaharnuła małoha ŭ anučy, pieramatała viaroŭkaj i vykinuła ŭ tualet na vulicy. Praz try dni siabroŭki, jakija viedali ab ciažarnaści, pacikavilisia, dzie ž dzicia. Adnak žančyna nie razhubiłasia i adkazała, što zakapała jaho, tamu što dzicia naradziłasia miortvym», — raspavioŭ Homielskaj praŭdzie prakuror adździeła prakuratury vobłaści Uładzisłaŭ Mihas.
Adna ź siabrovak raspaviała ab zdareńni dyrektaru miascovaj škoły, u jakoj pracuje. Jon źviarnuŭsia da staršyni sielsavieta, a ŭžo toj vyklikaŭ milicyju.
2 maja padčas ahladu doma i ziamielnaha ŭčastka pravaachoŭniki ŭ prybiralni znajšli skrutak ź miortvym dziciem.
Darečy, žančyna sama raspaviała im, što naradziła. Adnak pa jaje viersii, zdaryłasia heta jašče ŭ studzieni, dzicia naradziłasia miortvym, tamu jana jaho i vykinuła. Ale ekśpiertyza vyjaviła, što chłopčyk naradziŭsia niadaŭna, žyvy i žyćciazdolny. Taksama stała viadoma, što z momantu naradžeńnia jon pražyŭ ad piaci hadzin da sutak.
Tady hora-maci prydumała, što dzicia vykinuŭ jaje baćka, a da hetaha vypadku jon nibyta hetak ža pazbaviŭsia ad čaćviarych jaje novanarodžanych dziaciej.
U chodzie śledstva vyśvietliłasia, što dziadula nie datyčny da złačynstva. Bolš za toje, jon prajšoŭ pravierku na palihrafie — mužčyna nie viedaŭ pra ciažarnaść svajoj dački.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?21
Kamientary